Arjentina Hakat Ba Kuartu-Finál Hafoin Manán Ejiptu 3-2

Jogu Arjentina vs Ejiptu. Imajen/EFE

Díli, 08 Jullu 2026 (RAFA.TL)- Ekipa Selesaun Nasionál Arjentina hakat ba Kuartu-finál Kopa Mundiál 2026 hafoin halakon  nia adversáriu Ejiptu 3-2.

vitória ekipa selesaun Arjentina ne´e mai husi golu sira Cristian Romero, Lionel Messi, no Enzo Fernandez liu hosu jogu ne’ebé hala’o iha Estádiu Mercedes-Benz, Atlanta, Tersa-ne´e.

Enkuantu Ejiptu produz deit golu rua liuhosi Yasser Ibrahim no Mostafa Ziko. Iha jogu kopa mundiál, tinan ne’e, selesaun nasionál Ejiptu hatudu dezempeñu ne’ebé destakadu no halo istória hodi to’o iha Jornada 16 Tasa Mundiál nian.

Iha jogu ekipa Ejiptu lidera uluk iha minutu 15 bainhira Yasser Ibrahim marka golu hafoin aproveita kruzamentu ida hosi Marwan Attia, hodi muda kedas score ba 1-0.

Hafoin golu ne’e ekipa rua mantein ho ritmu jogu no Arjentina iha oportunidade atu halo empata, maibé Lionel Messi falla iha penalidade hafoin guarda-rede ejípsiu Mostafa Shobeir halo antesipasaun ho diak hodi salva bola ne´e iha minutu 21.

Arjentina kontinua halo presaun ba defeza ejípsiu, maibé vantajen 1-0 ne’ebé maka Mohamed Salah no nia kolega sira iha mantein nafatin too iha intervalu.

Iha inísiu segunda parte, Ejiptu halo tan supreza ba defeza Arjentina bainhira Mostafa Ziko marka tan golu ida ne´ebé ikus mai anula husi arbitu hafoin halo revizaun VAR.

Ejiptu konsege halo golu daruak iha minutu 67 hodi muda score ba 2-0 hafoin Mostafa Ziko halo pasajen ba Haissem Hassan hodi halo golu hasoru Argentina. Maski atraza ho golu rua, Arjentina konsege hamihis golu ne’e iha minutu 79 bainhira Cristian Romero hatama ho kabesa iha pasajen ne’ebé maka’as hosi Messi, hodi muda score ba 1-2.

Arjentina halo empata iha minutu 83 liuhosi volei ida hosi Messi hafoin simu pasajen ida hosi Gonzalo Montiel hodi halo empata ba 2-2.

Lionel Scaloni nia ekipa konsege muda jogu liuhosi kontra-atake iha tempu estra segunda parte, bainhira Enzo Fernandez marka golu iha minutu 90+2 hafoin simu asistensia hosi Lautaro Martinez hodi muda score ba 3-2. Ejiptu tenta atu halo empata iha tempu restu sira, maibé pontuasaun 3-2 ne’ebé favorese Arjentina mantein metin to’o apitu finál.

 Jornalista: David Gonçalves/Editór: Vito Salvadór