Arjentina Hakat Ba Finál Kopa Mundiál 2026 Hasoru España Hafoin Halakon Inglaterra 2-1

Arjentina sei joga hasoru España iha finál Kopa Mundiál 2026. Imajen/Getty

Díli, 15 Jullu 2026 (RAFA.TL)- Ekipa Nasionál Arjentina susesu rekolla tikete ba finál Kopa Mundiál 2026 hafoin halakon adversáriu Inglaterra ho score 2-1, iha Estádiu Mercedes-Benz, Atlanta, EUA, Kinta-ne’e.

Ekipa selesaun nasionál Inglaterra lidera uluk liu hosi golu Anthony Gordon nian iha inísiu segunda parte.

Arjentina susesu halo supreza liu husi golu Enzo Fernandez no Lautaro Martinez hodi asegura vitória dramátiku ba Arjentina hodi hakat ba finál Kopa Mundiál tinan ne´e haosru España.

Ekipa Arjentina no Inglaterra halo jogu ida ho intensidade as no nakonu ho presaun. Ekipa rua kontinua lansa kontra atake ba malu desde inisiu jogu, maibé la konsege aproveita oportunidade sira ne’ebé maka kria hodi marka golu.

Inglaterra iha oportunidade di’ak liu iha minutu 33 bainhira John Stones lansa bola livre husi Declan Rice iha poste dook, maibé ninia esforsu sai dook husi baliza Arjentina nian. No too intervallu ekipa rua mantein ho score 0-0.

Tama ba segunda parte, Inglaterra halo kedas kontra atake lais iha minutu 55, hahú ho movimentu ida hosi Morgan Rogers iha flanku loos, bola entrega ba poste dook, iha ne’ebé Gordon livre husi presaun no halo remata perfeitu hodi halakon guarda-rede Emiliano Martinez no muda score iha tabela ba 1-0.

Arjentina tenta atu hatán kedas bainhira Giuliano Simeone tama iha área penalti nian, maibé Djed Spence halo atake ida ne’ebé di’ak no krusiál hodi evita perigu.

Guarda-rede Inglaterra nian Jordan Pickford halo salvasaun ida ne’ebé maka’as hodi salva kabesa ida hosi Nicolas Gonzalez.

Inglaterra halo jogu ida ho defeza maka’ás no lakon foku balun, no treinadór Thomas Tuchel halo desizaun krusiál ida ne’ebé sai fatal hodi hatama defeza na’in tolu, Ezri Konsa, Dan Burn, no Nico O’Reilly, enkuantu troka Gordon, Rice, no Reece James.

Tuchel nia desizaun atu halibur defeza konvida duni asaltu ida ne’ebé maka’as liután hosi Arjentina, ikusmai, iha minutu 85, parede defeza inglés nian rahun bainhira Fernández marka golu ho atake ida ho distánsia dook hodi muda score ba 1-1.

Arjentina kontinua marka golu vitória nian iha minutu 90+2 liu husi kabesada  Lautaro Martinez iha tempu estra hafoin aproveita asistensia husi Leonel Messi. No golu ne´e sai golu detrminante hodi lori ekipa Arjentina ba finál.

Iha finál, Arjentina sei hasoru España, ne’ebé maka manán ona Fransa ho score 2-0 no jogu Finál sei hala’o iha Estádiu MetLife, Nova Jersey,  Domingu (19/07/2026).

Jornalista: David Gonçalves/Editór: Vito Salvadór