Arjentina Elimina Cabo Verde Husi Kopa Mundiál 2026 ho Score 3-2

Arjentina elimina Cabo Verde iha Kopa Mundiál 2026. Imajen/AFP

Díli, 04 Jullu 2026 (RAFA.TL) – Ekipa  Tubaraun Azul (selesaun nasionál Cabo Verde) elimina husi Kopa Mundiál 2026 hafoin sofre autogolu iha tempu adisionál iha jogu kontra Arjentina, Sábadu (04/07/2026) iha Estádiu Miami, Estadus Unidus Amérika.

Jogu entre Cabo Verde no Arjentina ne’ebé tenke hakat to’o tempu adisionál tanba iha jogu minutu 90 ekipa rua empata liu husi golu jogadór Lionel Messi  (Arjentina) iha minutu 29 no Cabo Verde responde liu husi Deroy Duarte iha minutu 59.

Hafoin empata iha tempu normal kontinua ba jogu tempu adisionál 15×2, iha ne’ebé Arjentina marka uluk golu liu husi Lisandro Martinez iha minutu 92 no Cabo Verde kontinua responde liu husi golu espektakular husi Sindy Lopes Cabral iha minutu 103 no ikus mai Arjentina rekolla vitória liu husi autogolu Diney Borges iha minutu 111.

Arjentina iha oportunidade dahuluk iha minutu 15, maibé Lionel Messi nia suta besik liu hosi poste liman-loos. Iha minutu 18, suta livre ida husi “La Pulga” konsege salva ho susesu husi guarda rede Cabo Verde Vozinha.

Arjentina ikus mai marka golu dahuluk iha minutu 29 liu husi Lionel Messi hafoin simu bola liuhosi Lisandro Martinez hodi muda score ba 1-0.

Arjentina kuaze marka golu daruak iha minutu 45, maibé Enzo Fernandez nia esforsu dook hetan paradu hosi Vozinha. Eskoru mantein 1-0 to’o intervallu.

Hafoin deskansa, Cabo Verde halo empata iha minutu 59  hafoin simu pasajen ida hosi Ryan Mendes iha flanku loos, Deroy Duarte lansa suta ida ne’ebé labele atu asegura hosi Lisandro Martinez nia ain hodi halai sees no tama ba guarda-rede Emiliano Martinez no muda score ba 1-1.

Ho empate ne´e obriga Arjentina tenke halo jogu ida agresivu liután, maibé kontinua falla. Lionel Messi nia sutu direita iha área penalti hasoru Vozinha iha minutu 63 sei falla tanba baliza Caboverdiano ne’e sei antesipa ho dia’k.

Iha minutu 72, suta livre seluk husi La Pulga mós sei nafatin salva husi guarda-rede Cabo Verde Vozinha.

Ho kontra atake sira ne’ebé iha, ekipa rua mantein ho score 1-1 too jogu termina.

Kontinua ba tempu adisionál, Lisandro Martinez marka golu daruak Arjentina nian iha minutu 92. Ida-ne’e hahú ho suta kantu ida ne’ebé maka Mac Allister kabesa no Lisandro Martinez halo suta ida ba kantu loos hosi rede, ne’ebé maka Vozinha labele asegura. Maibé, Cabo Verde konsege halo empata iha minutu 103 liu husi Sidny Lopes Cabral lansa suta ida hosi área penalidade nia ninin ba kantu loos hosi baliza Arjentina nian hafoin simu pasajen ida hosi Yannick Semedo.

Tuirmai Arjentina hetan golu datoluk iha minutu 111 liu husi bola kantu ida husi Messi no kabesa husi Cristian Romero; bola ne’e kona Diney Borges nia liman no semo ho di’ak ba kantu loos hosi baliza Vozinha nian no ho autogolu ne’e halo Arjentina lidera 3-2 too jogu termina.

Ho vitória ne’e, Arjentina sei enfrenta Ejiptu iha Tersa, 07 Jullu 2026  iha Estádiu Atlanta iha jornada 16 Kopa Mundiál 2026.

Jornalista: David Gonçalves/Editór: Vito Salvadór