Angela Freitas Sai Primeiru Lugar iha Kategoria Full Maraton Nasionál no Rekolla Prémiu US$4,000.00

Atleta nasionál Angela Freitas de Fatima Araújo konkista primeiru lugar iha kategoria Full Marathon Nasionál feto iha eventu Díli Internationál Maratona (DIM) 2026.

Díli, 09 Agostu 2026 (RAFA)– Atleta nasionál, Angela Freitas de Fátima Araújo ho númeru dorsal 25 sai primeiru lugar iha kategoria Full Marathon Nasionál Feto, iha eventu Díli Internasionál Maratona (DIM) 2026 ho rejistu tempu oras tolu-resin no konkista prémiu osan ho montante US$4,000.00

Ba RAFA iha Palásiu Prezidensiál, Sábadu-ne’e, Angela Freitas de Fátima Araújo, esplika, sira-nia preparasaun ba kompetisaun ne’e hahú ona husi fulan-Janeiru no kontinua dezenvolve liután ho treinamentu intensivu durante fulan-rua ne’ebe hetan apoiu husi governu to’o iha loron kompetisaun.

“Hanesan atleta nasionál sente orgullu, la haluha agradese ba Prezidente Repúblika, José Ramos-Horta ne’ebé inisia eventu ne’e, no e la haluha mós agradese ba ami nia treinadór Odete Belo ne’ebé durante ne’e akompaña ami,” Angela Freitas hateten iha ámbitu simu premiu kampeaun.

Angela haktuir nu’udar atleta, nia sei kontinua esforsu no servisu maka’as liután no sei uza esperiénsia husi kompetisaun ida ne’e hanesan motivasaun atu hadi’a tan nia prestasaun, ho esperansa katak iha eventu sira tuir mai bele hatudu rezultadu ne’ebé di’ak liután no lori naran Timor-Leste ba nivel aas liu liu.

Jornalista: Davilio Valdamir