Desporto

Andriansyah Augustin, Jogador Prinsipál F.C Coelho Muda Ba Mushila F.C

todayNovember 5, 2026 28 1

Background
share close

Díli, 05 Novemberu 2026 (RAFA) – Treinador klubu F.C Coelho, Franzenio da Cruz Martins, informa jogador prinsipál Andriansyah Augustin ne’ebé konhesidu ho naran Adom, muda ba Mushila F.C iha janela transferénsia Liga Futsal Timor-Leste, maibé ne´e sei la afeta ba identidade, karaker no sistema jogu ne’ebé ekipa harii durante kompetisaun.

Treinador .FC Coelho, Franzenio da Cruz Martins, ba RAFA, Kuarta-ne´e, iha Díli, konfirma katak maski Adom sai husi ekipa, F.C Coelho sei kontinua mantein filozofia jogu, sistema organizasaun no espíritu luta nu’udar baze prinsipál atu enfrenta kompetisaun Liga Futsal Timor-Leste.

Nia subliña katak futsal la depende de’it ba jogador ida, tanba kada atleta iha nia responsabilidade no papel importante iha ekipa. No admite katak saída Adom halo F.C Coelho sente lakon uitoan, tanba jogador ne’e iha nia karakter no kontribuisaun rasik. Maski nune’e, situasaun ne’e la’ós obstákulu boot ba ekipa atu kontinua kompete no mantein ambisaun iha kompetisaun.

“Ha´u nia hanoin relasiona ho Adom ne’ebé mak sai ona, ami sente lakon oituan maibé ami atu koalia Konaba karakter F.C Coelho nian nafatin hela no kualker jogador se de’it mak sai mai ami ladun impaktu.  Tanba ami iha karakter rasik ami iha sistema no espiritu ne’ebé mak luta sei iha nafatin,” hatete Franzenio da Cruz Martins.

Andriansyah Augustin nu’udar eis-jogador selesaun nasionál futsal Indonézia, ne’ebé hahú nia aventura kareira profisionál iha Liga Futsal Timor-Leste iha tinan 2025 ho Mushila FC. Depois, muda ba F.C Coelho atu kontinua nia kompromisu iha kompetisaun Liga futsal iha Timor-Leste.

Maibé, liuhusi janela transferénsia atual, jogador ho nasionalidade Indonézia ne’e deside fila fali ba Mushila F.C atu kontinua nia kareira ho klubu ne’ebé uluk sai fatin nia hahu jornada iha Futsal Timor-Leste.

Jornalista: Davilio Valdamir/ Marito da Costa

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!