Alemaña Asegura Billete Ida Ba Faze Eleminasaun Hafoin Manán Kosta Marfim 2-1

Jogadór Alemaña selebra vitória hafoin manán Kosta Marfim ho score 2-1 iha Kopa Mundiál 2026. Imajen/REUTERS

Díli 21 Juñu 2026 (RAFA.TL)- Alemaña hetan vitória ida ne’ebé importante no dramátiku hasoru Kosta Marfim hodi asegura billete ida ba faze eleminanasaun.

Jogu entre Alemaña no Kosta Marfim iha grupu E, Kopa Mundiál 2026 ne’ebé hala’o iha Estádiu BMO Toronto, Domingu (21/06/2026),  Alemaña domina kedas jogu husi inísiu. Maibé, Kosta Marfim kontinua halo jogu ida ho disiplina no mantein asegura pozisaun hodi lansa kontra atake lais.

Alemaña dominante iha jogu ne’e no lansa ameasa uluk iha minutu 11. Joshua Kimich simu kruzamentu ida hosi Kai Havertz no anxe kedas bola kabesada ba kantu, maibé guarda-rede halo sala.

Jogadór Alemaña Jamal Musiala hetan oportunidade atu marka golu iha minutu 19 no nia suta husi área penalidade nia ninin sai dook husi alvu.

Alemaña iha oportunidade iha minutu 23, liu husi Aleksandar Pavlovic halo falta ba guarda-rede Tahia Fofana iha luta ida ba bola aéreu ida.

Maski iha presaun ne’ebé kontinua, Kosta Marfim maka lidera uluk jogu ne’e liu husi jogadór Frank Kessie iha minutu 30 hafoin aproveita bola rebote iha área grandeal laran. Golu ne’e antena too primeira parte termina.

Tama ba segunda parte, ekipa Alemaña kontinua mantein domina jogu, maibé Kosta Marfim kria ameasa ida iha minutu 53 liu husi jogadór Inao Oualai nia suta husi kruzamentu Diallo nian.

Esforsu Alemaña fó rezultadu iha minutu 68, Nadiem Amiri halo esforsu hodi lansa bola kruza no jogadór Deniz Undav marka kedas golu ida ba nia ekipa hodi muda score ba 1-1.

Hafoin golu ne’e, Kosta Marfim iha kedas oportunidade di’ak hodi manán iha minutu 90 liu husi kontra-atake ida, Nicolas Pepe halo tesi ba laran hosi liman-loos no pasa ba Simon Adingra, ne’ebé maka livre iha liman-karuk. Maibé sei falla.

Ho oportunidade ne’ebé iha, Alemaña marka golu daruak iha minutu 94 hafoin simu pasajen husi Nmecha husi klaran, Undav marka kedas golu hodi muda score ba 2-1.

Ho vitória ne’e ekipa Alemaña kontinua lidera grupu E ho pontu neen husi jogu rua no asegura billete ida ba faze eleminasaun.

Kosta Marfim mantein iha segunda klasifikasaun ho pontu tolu husi jogu rua, manan ida no lakon Ida.

Asiste nafatin transmisaun Kopa Mundiál 2026 iha kanál ofisiál NTV/ETO-Telco ho live streaming tv.timortelecom.tl

Jornalista: David Gonçalves/Editór: Vito Salvadór