Aitana F.C Mantein iha Zona Degradasaun Hafoin Sofre Derrota ho Assalam F.C iha Jornada da-hitu

Jogu Aitana F.C vs Assalam F.C iha kontinuasaun Liga Timorense primeira divizaun époka 2026. Imajen/LFTL

Díli, 15 Jullu 2026 (RAFA.TL)- Ekipa Aitana F.C mantein iha zona degradasaun no ameasadu atu degrada ba segunda divizaun hafoin derrota kontra adversáriu Assalam F.C ho score 2-1, iha jogu kontinuasaun Liga Timorense primeira divizaun époka 2026.

Jogu entre ekipa rua ne’ebé halao iha  Estádiu Munisipál Díli, Tersa-ne´e, hanesan jogu desizivu ba ekipa rua atu hodi determina sira nia destinu iha tabela klasifikasaun ho nun´e ekipa rua hatudu jogu furak hodi lansa kontra atake ba malu desde jogu hahu.

Assalam F.C  lansa kedan atake liu husi liña parte karuk hodi lansa bola ba grande área,  maibé guarda rede Aitana sei antisipa ho di’ak.

Tama ba iha minutu neen, Aitana F.C lansa suta ameasa dala ida liu husi sutu livre, maibé bola seidauk kona tarjetun no tama ba iha minutu 10, Assalam F.C lansa sutu ameaasa hikas liu husi jogadór Bonarudin Amin maibé sei blokeia husi defeza Aitana nian.

Tama ba iha minutu 30, Aitana F.C halo kontra atake lais liu husi jogadór Richard Nana Yaw  atu produs golu, maibé bola kona de’it poste baliza Assalam nian, nune’e la rezulta golu.

Golu ne’ebé adeptus Assalam F.C hein ikus mai akontese iha minutu 45+4 liu husi jogadór  Natalicio Soares  hodi muda score ba 1-0 molok ba intervallu.

Kontinua ba jogu segunda parte, tensi jogu kontinua manas. Assalam lansa kedan atake ho másimu hosi liña  Aitana maibé defeza Aitana F.C mantein solidu.

Tama ba iha minutu 58, jogadór Aitana F.C João Siqueira susesu marka golu ida hodi muda score ba 1-1.

Ho golu refere intensidade jogu komesa manas liután ba ekipa rua ne’e hodi lansa kontra atake ba malu no tama ba iha minutu 66, Agosto da Costa simu bola husi liña klaran foti matan haree guarda rede Aitana nia pozisaun sai liu, nune´e aproveita lansa kedan bola ba rede Aitana, bola ne’e konsege tama liubá rede Aitana nian hodi muda score ba 2-1.

Hafoin golu ne´e, ekipa rua kontinua halo kontra atake ba malu, maibé laiha tan golu ruma akontese no ekipa Asslam F.C mantein lidera no lori fila vitória ba nia ekipa.

Husi rezultadu vitóri ane’e hatuur ekipa Assalam F.C iha pozisaun da-neen ho pontu ualu husi jogu hitu, manan rua, empata rua, no derrota tolu.

Ekipa Aitana F.C mantein iha zona mean ho pontu tolu husi husi jogu hitu, derrota haat no empata tolu.

Iha jogu tuir mai Aitana F.C sei hasoru ekipa Santa Cruz F.C, iha  jornada da-ualu no AD SLB iha jornada da-sia

Jornalista: Davilio Valdemir/Editór: Vito Salvadór