Ahi-Han Ofisina Tifa Motór, Deskonfia Kauza Husi Sirkuitu Eletrisidade

Ahi-han ofisina Tifa Motór iha Kulu-hun de Baixo, Dili, Segunda (06/10/2025). Imajen Rafa.tl

DILI, RAFA.tl – Komunidade iha Dili, liuliu hirak ne’ebé hela iha área Kulu-hun de Baixo no área sira besik, Segunda  dadeer (06/10/2025),  hale’u tuku 07:45 Otl, hakfodak ho ahi-suar maka’ás kauza husi ahi-han ofisina Tifa Motór.

Tuir informasaun katak inséndiu ne’e akontese deskonfia kauza husi sirkuitu eletrisidade. Insidente ne’e  la rezulta vitíma mortal, maibé sasán sira iha ofisina laran la salva, inklui karreta no motoriza no asesoria ba  karreta ahi-han totál.

Komandante Bombeiru Dili, Diogu Angelo Barreto de Araújo ba Rafa.tl iha fatin akontesimentu iha Kulu-hun, hateten  sira-nia parte asesu informasaun liuhosi rádiu polísia iha tuku 07:45 Otl, nune’e sira to’o kedas iha fatin akontesimentu hodi halo atuasaun atu bele atua inséndiu ne’e  la bele daet ba iha komunidade sira ne’ebé hela besik.

Tuir informasaun ne’ebé ekipa Bombeiru Dili rekolla iha terrenu husi traballadór sira ne’ebé servisu ba Tifa Motór katak kauza  husi inséndiu ne’e tanba sirkuitu husi eletresidade.

“Konforme traballadór sira ofisina Tifa Motór katak kauza ne’e mosu tanba iha sirkuitu iha uma-laran rezulta ahi-han ne’e tanba sasán sira ne’ebé iha laran mesak buat ida ne’ebé fasil atu ahi-han hanesan oliu, pesa karreta  sira ne’e, masa maka barak liu no mós iha gazóleu karreta sira ema hodi mai hadia ne’e mak halo ahi han karreta hira kedas,” Diogo Angelo Barreto de Araújo hateten.

Akontesimentu ne’e rezulta ahi han karreta haat, motór kompañia nian ida , pesa kareta, inklui asesorie no ekipamentu sira iha ofisina la salva total.

Iha fatin akontesimentu ne’e mós jornalista Rafa.tl tenta atu halo konfirmasaun ho kompañia Tifa Motór maibé sira la iha komentáriu ruma kona-bá  akontesimentu refere.

Reportajen ekipa Rafa.tl