AFTL Sei Diskualifika Jogadór Sira Husi Kampu Boot Joga iha Liga Futsal

Assosiasaun Futsal Timor-Leste (AFTL) hala’o 1º Enkontru Orgaun Ezekutivu AFTL Sesta, 06 Marsu 2026. Imajen/AFTL

Díli, 31 Jullu 2026 (RAFA.TL)– Sekretáriu Jerál Asoisasaun Futsal Timor-Leste (AFTL), Mario Guterres,  Kinta-ne’e, pronúnsia  regra foun ba Liga Futsal époka 2026-2027 ne’ebé la admite atu klubu sira lori jogadór husi kampu boot joga iha Liga Futsal ne’e.

“Ba regra ida-ne’e, ami sei partilla iha technical meeting mas se klubu sira halo tentativa nafatin hodi submeter jogadór kampu boot sira iha Liga Futsal ne’e, pasénsia sira sei simu sansaun todan halo diskualifikasaun ba sira no mós sansaun ba jogadór sira,”  Sekretáriu Jerál Asosiasaun Futsal Timor-Leste (AFTL), Mario Guterres haktuir ba RAFA.TL iha  iha Díli.

Mario Guterres esplika katak AFTL halo ona koordenasaun ho Liga Timorense atu troka lista jogadór sira. Tuir nia, lista ne’e sei uza hanesan baze atu halo verifikasaun durante prosesu rejistu, hodi asegura katak jogadór ne’ebé rejista ona ba Liga Timorense labele partisipa iha Liga Futsal Timor-Leste.

Nia fundamenta katak medida ne’e importante atu proteje integridade kompetisaun futsal, tanba kompetisaun kampu boot normalmente dura de’it fulan rua. Kondisaun ne’e bele halo jogadór balun fila-fali mai futsal, ne’ebé bele prejudika dezenvolvimentu no kompetisaun ba atleta futsal sira.

AFTL no Liga Timorense kontinua halo koordinasaun atu asegura regulamentu ne’e bele implementa ho di’ak.

“Husi sirkulasaun ne’ebe ami  hasai sira ne’ebé joga iha liga kampu boot labele joga  liga futsal, tinan ne’e, laiha toleránsia ba ida-ne’e maske afeta maka’ás ba AFTL mais ita laiha dalan seluk hakarak dezenvolve di’ak ita nia modalidade ida ne’e,”  Mario Guterres hateten.

Liga futsal époka ne’e sei realiza iha fulan-Agostu, tinan ne’e, no sei kompete husi ekipa futsal 24, kompostu husi ekipa 14 kompete iha primeira divizaun no segunda divizaun sei kompete husi ekipa 10.

Jornalista: Davilio Valdamir