AFTL Husu Jogadór Sira Tau Prioridade Ba Espíritu Fair Play

Abertura Liga Futsal Timor-Leste Époka 2026.

Díli 15 Setembru 2026 (RAFA)- Asosiasaun Futsál Timor-Leste (AFTL), husu ba atleta, treinadór, ofisiál no apoiante klubu sira hotu atu tau prioridade ba espíritu Fair Play durante kompestisaun hodi mellora no kualifika kualidade kompetisaun Liga Futsal iha Timor-Leste ba nível aas liután.

Membru Ezekutivu AFTL, Nurima Alkatiri iha nia diskursu iha abertura Liga Futsal Timor-Leste Époka 2026 kampu Futsal Kuartel Jenerál FALINTIL-Forsa Defeza Timor-Leste (F-FDTL), Segunda-ne’e hatete, maski kompetisaun presiza intensidade no espírito atu luta ba vitória, maibé partisipante hotu-hotu tenke nafatin respeita kolega iha ekipa, adversáriu, árbitru, regulamentu no rezultadu finál.

“AFTL Hakarak husu ba atleta treinador no ofisial no apoiante klubu sira hotu tau valor sira ne’e nuudar pripridade durante kompestisaun Ita bele kompete ho intensidade Ita bele luta atu manan maibé ita Tenke nafatin respetu Ita Nia kolega sira husi Ita Nia ekipa no ita nia adversariu respeita arbitu respeita regulamentu no respeita rezulatadu fianl” hatete Membru Ezekutivu AFTL, Nurima Alkatiri.

Nurima subliña katak desportu tenke sai meiu atu hametin unidade no hamutuk ema hotu, la’ós sai kauza atu fahe malu. Tanba ne’e, nia husu atu provokasaun, violénsia, diskriminasaun no insultu labele iha kompetisaun futsal.

Nia mós hateten katak, kualidade atleta la’ós de’it haree husi númeru golu ka troféu ne’ebé nia manan, maibé mós husi karakter, disiplina no maneira nia hatudu respeitu ba adversáriu, tantu bainhira manan ka lakon.

Iha Fatin hanesan, membru Ezekutivu Federasaun Futsál Timor-Leste (FFTL), Domingos Caeiro, afirma katak klubu sira mak sai parte importante iha dezenvolvimentu no fortalese Asosiasaun Futsál Timor-Leste (AFTL).

Nia husu klubu sira atu la tau presaun ba prezensa jogadór estranjeiru, maibé haree ida-ne’e nu’udar oportunidade atu motiva no hasa’e kualidade jogadór lokál.

“Prezensa jogadór estranjeiru tenke sai oportunidade atu motiva no hasa’e kualidade jogadór lokál. Ita presiza aproveita sira-nia esperiénsia atu fahe ba atleta lokál, hodi dezenvolve jogadór potensial ba futuru selesaun nasionál,” hatete, Domingos Caeiro.

Domingos Caeiro subliña katak, ho esperiénsia husi jogadór estranjeiru ne’ebé rekruta hosi klubu sira bele fahe ba atleta lokál, hodi ajuda klubu sira dezenvolve jogadór potensial ne’ebé iha futuru bele kontribui ba selesaun nasionál futsal.

Jornalista: Davilio Valdamir/ Fidelino Araujo