AFTL Aplika Regra Foun Ba Liga Futsal La Dezakredita Jogadór Lokal

Prezidente Asosiasaun Futsal Timor-Leste, Antoninho Junior Guterres.

Díli, 26 Agostu 2026 (RAFA) –Prezidente Asosiasaun  Futsal Timor -Leste (AFTL) Antoninho Junior Guterres, klarifika katak regra foun ne’ebe aplika husi AFTL  ba liga futsal époka 2026, la’ós dezakredita jogador lokal sira.

Prezidente AFTL, Antoninho Junior Guterres AFTL permite utilizasaun   jogador estranjeiru na’in-tolu iha kampu ba atividade jogu kompetisaun  liga  futsal époka  2026 refleta iha regra tuan ne’ebé estrutura antriór sira aplika tiha ona.

“Regra ida ne’e, ita la’ós foin aplika iha liga époka ida ne’e. Maibe, ita aplika tiha iha kopa iha tinan 2025, estrutura anteriór sira aplika katak sira iha jogadór estranjeiru rejistu iha  na’in-haat. Mas iha kampu laran na’in-rua ho intensaun ida ne’e laos hanesan atu dezakredita la fo prioridade ba iha jogador lokal,” Prezidente AFTL klarifika.

Nia hatutan hanesan entidade hotu hatene sira rasik hare katak, joga futsal ne’e ho intensidade ne’ebe aas tebes tanba joga minutu 20, bele dehan  to’o iha oras ida. Tanba oras halo sira joga ne’e kleur iha kampu laran ne’e bele tolu, maibe sira na’in-tolu la joga to’o hotu.

Haré ba tempu joga futsal ne’e kleur  liu minute 2,3 tenke troka halo rotasaun hela de’it iha klubu ne’ebe deit, sira iha kbiit uitoan sira lori jogador na’in-haat to’o  na’in-lima.

Lideransa AFTL ne’e  hatutan regra foun ne’ebe implementa hanesan pasu importante ida mós ba jogador lokal sira oinsá atu hatoman aan hodi bele kompete ho jagador estranjeiru sira.

Nia dehan tan klubu sira lori mai maioria sira joga husi liga primeira  divisaun, segunda divisaun indonézia nian mós mai joga ba iha  ne’e atu gaña sira nia esperiensia ida  ne’e mak AFTL haré  hodi deside ba tuir.

Aliende ne’e nia mós rekoñese Jogador lokal iha talentu di’ak  ba futsal, sira iha vontade, maibé sei minimu tebes abilidade.

Tuir planu Liga Futsal époka 2026 sei abertura iha loron 12 fulan-Setembru ne’e, no sei partisipa  husi klubu hamutuk 24 , envolve husi klubu primeira divisaun  na’n-14 no segunda divisaun  na’in-10.

Jornalista: David Gonçalves