Aero Dili Sei Hasa’e Folin Billete 20% no Citilink Mós Sei Hasa’e

Na'in ba Aero Dili, Lourenço de Oliveira

DÍLI, RAFA.tl – Na’in ba empreza airline Aero Dili, Lourenço de Oliveira, hateten sira-nia parte sei hasa’e presu billete pasajeiru kuaze 20% tanba aumentu boot iha folin mina (kombustível) globál ne’ebé akontese husi funu iha Médiu Oriente.

Notísia Relevante: Rota Direta Aero Díli Ba Darwin Hametin Lasu Ekonómiku no Estratéjiku ho Timor-Leste

“Mina folin iha mundu sa’e hotu ona, implika duni, hakarak ka lakoi tenke hasae 20%, husi folin tikete ka billete,” Lourenço de Oliveira, informa hodi responde jornalista sira iha edifísiu Ministériu Transporte no Komunikasaun, Caicoli, Tersa (24/03/2026).

Nain ba Aero Díli ne’e klarifika kona-bá operasaun Aero Dili ba Rejiaun Administrativa Espesiál Oé-cusse-Ambeno (RAEOA), dadauk ne’e, suspende hela tanba pasajeirus minimu liu.

“Oé-cusse ita atu ko’alia los, nia pasajeiru menus liu, depois buat ida tan maka persiza ha’u klarifika ba públiku katak Aeroporto Internacional Rota do Sândalo seidauk iha sertifikasaun ICAO (International Civil Aviation Organization). Ita ba Oé-Cusse ne’e nu’udar espritu Nasionalizmu no patriotizmu  Timoroan,” Nia argumenta.

Emprezariu Nasionál ne’e mós esplika kona-ba nia sorumutu ho Ministru Transporte no Komunikasaun (MTK), Miguel Marques Gonçalves Manetelu, hodi diskute kona-bá preparsaun operasaun vó Aero Dili nian iha nasaun sira membru ASEAN tanba Timor-Leste sai ona Membru Permanente ASEAN.

Kona-bá Governu atu autoriza tan aviaun seluk atu halo mós operasaun  ka vó iha  Denpasar-Díli no Díli-Denpasar hanesan mós rota Aero Dili ho Citilink nian durante ne’e, Lourenço de Oliveira konfirma  presiza haré mós kresimentu pasajeiru sira.

Nia tenik, buat hotu-hotu depende ba kresementu pasajeirus, husi parte Governu mós la’ós foti desizaun arbiru de’it kuandu seidauk iha pasajeirus maka’ás no over ida-ne’e hanoin governu konsiente ida-ne’e para suporta nasional airlines.

Citilink Posibilidade sei hasae mós folin billete

Diretór Ezekutivu  Citilink,  Fernando da Silva, hateten maske daudaun ne’e presu  billete pasajeirus sei lao normal, maibé posibilidade presu bele sae tanba airlines internasionál hahú hasae ona preseu billete aviaun nia.

“Ita ko’alia kona-bá aviaun, ita hotu-hotu rona no  ha’u haré iha airlines  internasionál sira, nia presu ne’e hahu sae, tikete hahú sae, maibe  Citilink liuliu rota Denpasar-Díli no Díli-Denpasar, presu ne’e mantein, seidauk iha presu ida ne’ebé  sae  tamba impaktu husi funu  iha Médiu Oriente. Ita lahatene, maibé kuandu Airline hotu-hotu,  bisnis hotu de’it iha ne’ebé de’it konserteza kuandu  mina ne’e sae  otomatikamente hotu-hotu tenke sae, se o la sa’e, o atu hetan rendimentu husi ne’ebe,” Fernando da Silva ba Rafa.tl iha nia rezidénsia Fomento, Kinta foin lalais ne’e.

Nia hatutan daudaun ne’e presu kombustível mundiál ne’ebé sae besik  porsentu lima, no laiha solusaun lalais bele fó impaktu ba  presu pasajeirus sira iha rora aviaun nia  bele sae hotu.

Fernando da Silva subliña merkadu  timor ne’e agora daudaun ne’e Aero Díli ho Citilink de’it,  lor-loron mamuk hela, antes funu ne’e mós mamuk  hela, loron ida pasajeiru entre na’in-50, 60, 70, talvez di’ak mak na’in-100, Timoroan  mak mesak sae de’it, ko’alia turizmu la la’o ida, ema la mai barak ida.

Reportajen ekipa Rafa.tl