AD SLB Laulara Orgullu Hafoin Dekada Ida Fila Hikas Sai Kampiaun Liga Timorense

AD SLB Laulara Orgullu Hafoin Dekada Ida Fila Hikas Sai Kampiaun Liga Timorense.

Díli, 24 Jullu 2026 (RAFA.TL)- Ekipa AD SLB Laulara  ho naran estimadu Makikit Laulara orgullu hafoin dekada ida desde Liga Timorense sei Amadora (2016), ohin, Makikit Laulara fila hikas sai kampiaun hafoin luta naruk durante jornada sia nia laran.

Ekipa Makikit Laulara nia kampiaun ne’e hatudu husi servisu maka’ás no koletiva ne’ebé kontinua ho paisaun no sakrifisu, disiplina no domin ba sira nia talentu luta iha kampu laran hodi rekolla vitória ualu no empata ida durante jogu sia primeira divizaun  Liga Timorense époka ne’e.

Kapitaun ekipa AD SLB Laulara, Filomeno Junior, hateten katak titúlu kampiaun ne’e responde ona ba adeptu sira ne’ebé hein tempu naruk, atu haré Makikit Laulara selebra hikas titúlu kampiaun, hafoin kampiaun Liga Futeból Amadora iha 2016.

“Ita hotu hatene tinan-10 ne’e la’ós tinan ne’ebé lais, tempu naruk adeptu sira hein, ohin, momentu ida ne’ebé furak tanba AD  SLB selebra fali kampiaun, ida ne’e ha’u sente kontente tebes,” Filomeno Junior  informa ba jornalista sira, iha estádiu Munisipál Díli.

Kapitaun Makikit Laulara ne’e subliña, titúlu kampiaun ida ne’e dedika espesial ba antigu jogadór AD SLB Laulara sira, adeptu, familia jogadór sira hotu no amante futeból hotu ne’ebé sempre fó tempu hodi akompaña ekipa Makikit Laulara durante ne´e.

Iha fatin hanesan, Sekretáriu Jerál ekipa AD SLB Laulara, Domingos Caero, parabeniza ekipa treinadór no jogadór sira, tanba bele oferese fila-fali titúlu kampiaun ba klubu refere, hafoin tinan-10 la sai kampiaun.

“Ha’u hakarak parabeniza ba ekipa treinadór, ne’ebé durante organiza alin jogadór sira iha sesaun treinamentu, ohin, rezultadu hatudu katak AD SLB sai kampiaun ba LFTL époka ne’e, tanba kleur ona AD SLB tenta atu sai kampiaun,  felizmente ohin AD SLB bele realiza hikas nia mehi hodi sai kampiaun,” Domingos Caero hateten.

Sekretariu Jerál ne’e Klube futeból AD SLB Laularan ne’e hatutan la’ós kampiaun mak importante, maibé oinsá atu hamoris talentu futeból para bele hetan jogadór ne’ebe di’ak atu reforsa selesaun nasionál.

Ho kampiaun ne’e, nia akresenta ekipa refere sei prepara an di’ak liután, hodi ba partisipa Kampionatu AFC iha tinan oin.

“Espera katak tinan ne’e AD SLB bele hetan fatin iha ne’ebá, maibé depende ba órgaun liga atu relata ba Federasanun Futeból Timor-Leste (FFTL), para FFTL bele komunika ba AFC no FIFA atu SLB bele hetan fatin iha kampionatu ASEAN nian. Maibé antes to’o iha ne’eba ita presiza iha lisensiamentu ba jogadór sira, lisensa ba klubu no kriteria balun, ha’u hanoin SLB preparadu ba ida ne’e,” nia tenik.

Iha jornada ikus, SLB konfirma nia kampiaun hafoin manán adversáriu Aitana F.C ho score 3-0, hodi hakotu jejum troféu durante tinan-10 (dezde tinan 2016) no lori alegria boot ba adeptu, jogadór sira no família boot klubu nian.

Jornalista: Davilio Valdemir/Editór: Vito Salvadór