AD SLB Laulara no Karketu Díli F.C iha Esperansa, Nilton Gusmão Halo Mudansa Ba FFTL iha Períodu 2026-2030

Prezidente FFTL, Nilton Telmo Gusmão dos Santos. Imajen/Rafa.tl

DILI, RAFA.tl – Dirijente sira klubu AD SLB Laulara no Karketu Díli F.C iha esperansa katak Prezidente Ezekutivu Atuál Federasaun Futeból Timor-Leste (FFTL)  Nilton Telmo Gusmão dos Santos,  sei halo mudansa ba Federasaun iha mandatu períodu 2026 to’o 2030.

Notísia relevante: Nilton Gusmão ho Tenente-Jenerál Falur Rate Laek, Kandidatu Úniku Elejível Lidera FFTL Períodu 2026-2030

Deklarasaun ne’e, dirijente klubu sira hato’o relasiona ho anúnsiu ne’ebé Komité Independente, Federasaun Futeból Timor-Leste halo hodi anúnsiu katak, Prezidente atuál Nilton Telmo Gusmão dos Santos no Vise Prezidente Tenente-Jenerál Domingos Raul Falur Rate Laek, sai hanesan pakote kandidatu  úniku ne’ebé elejível ba Prezidente ho Vise Prezidente hodi lidera Federasaun Futeból Timor-Leste ba períodu 2026-2030.

Sekretáriu jerál AD SLB Laulara, Domingos Cairo, garante ho sira nia esperiénsia  ne’ebé iha, Prezidente Atuál Federasaun Futeból Timor-Leste Nilton Telmo Gusmão dos Santos sei lori mudansa boot ba FFTL.

“Ha’u hanoin, irmaun Nilton hatudu ona nia prestasaun iha tinan restante, mandatu ne’e, nia hatudu katak nia ba Federasaun ne’e ho nia vontade tomak, ho paixaun hanesan ho ninia motto katak, paixaun ba bola duni. Tanba nia hakarak lori futeból ne’e sai orgullu nasional, no nia hatudu dadauk avansu ida ne’e. Ita presija ran foun, ran ida ne’ebé nakali no motiva joven sira. Tanba ne’e maka SLB prontu apóiu 100% ba irmaun Nilton, avansa tanba kandidatu úniku. Ha’u hanoin laiha tan kandidatu seluk atu kompete, no ohin dadér enkontru ho assosiasaun sira, ha’u mos hanesan membru ezekutivu ida, enkontru ho membru assosiasaun sira, 100% sira fó apóiu tomak ba irmaun Nilton atu sai prezidente, la’os períodu tinan 4 ida ne’e, sira iha esperansa katak se bele, irmaun Nilton bele to’o 2034, ida ne’e maka sira nia esperansa, tanba iha mudansa” hatete Sekretáriu jerál AD SLB Laulara, Domingos Cairo, ba  Rafa.tl iha Otél Timor, Tersa (13/01/2026).

Iha fatin hanesan, Prezidente Karketu Díli F.C, Luís de Oliveira, apresia no fiar ho lideransa Nilton Telmo Gusmão dos Santos,  tanba  antes ne’e konsege ultrapasa dezafiu hotu ne’ebe FIFA  fó ba Timor-Leste.

“Figura rua ne’e hatudu hosi enkontru ohin dadersan katak, asosiasaun hamutuk 21 ne’ebé hotu-hotu fó nia apóiu ba kandidatu úniku maka Sr. Nilton ho Sr. Falur esperansa mantein nafatin atu hadi’a liu tan lideransa ne’ebé maka sira hala’o durante tinan ida  ba kotuk, tinan haat mai atu bele halo football di’ak liu. Nia hatudu ona ba iha públiku buat ida ne’ebé maka FIFA husu, regulamentu hamutuk 12 ne’ebé konsegue ultrapassa. Ita bele halo buat hotu iha ita nia rai, maibé tenki ser hakru’uk ba iha FIFA. FIFA nia regulamentu konsegue tinan 1 de’it prezidente no ninia estrutura konsege ultrapassa. Hala’o nafatin Taça da Liga hodi prepara ba liga ida ne’e importante tebes hodi nune’e jogadór sira ho klubu sira bele prepara aan di’ak liu tan.” Hateten Prezidente Karketu Díli F.C, Luís de Oliveira.

Atu fó hanoin katak, Prezidente Atuál Federasaun Futeból Timor-Leste Nilton Telmo Gusmão dos Santos, lidera Federasaun tinan ida hodi kompleta restante mandatu ne’ebé iha no konsege lori susesu boot ba federasaun hodi kompleta rekezitu sira husi FIFA hodi lori hikas Futeból Timor-Leste ba partisipa iha kompetisaun rejionál no internasionál sira.

Reportajen ekipa Rafa.tl