AD SLB Laulara Mantein Lidera Tabela Klasifikasaun Primeira Divizaun Hafoin Manán Emmanuel F.C 1-0

Ekipa Makikit Laulara (AD SLB Laulara). Imajen/LFTL

Díli, 10 Jullu 2026 (RAFA.TL)- Ekipa AD SLB Laulara (Makikit Laulara) provizoriamente mantein lidera tabela klasifikasaun primeira divizaun Liga Timorense époka 2026 hafoin manán adversáriu Emmanuel F.C ho score 1-0.

Iha  jogu ne’ebé hala’o iha Estádiu m Munisipál Díli, Kinta-ne’e, ekipa Makikit Laulara no Emmanuel F.C hahú jogu ho intensidade as tuir ritmu ida-idak nian.

Ekipa AD SLB Laulara hola kedas inisiativa hodi koko domina bola no halo kontrolu ba jogu no fó presaun aas ba liña defeza Emmanuel F.C, hodi loke oportunidade atu marka golu.

Atake sira husi AD SLB Laulara mosu husi sorin karuk no klaran, obriga Emmanuel F.C atu konsentra an iha defeza.

Kombinasaun pasajen lais no movimentu di’ak husi jogadór sira halo Emmanuel F.C dala barak tenke hasai bola husi área perigózu.

Maske SLB domina jogu no kria oportunidade lubuk ida, maibé sei falla iha finalizasaun ho marka golu.

Ekipa Emmanuel F.C halo jogu barak liu iha nia área hodi hein bola oportbidade atu lansa kontra, maibé defeza AD SLB Laulara organiza-an ho metin no la fó biban ba adversáriu  to’o jogu priemeira parte termina score mantein 0-0.

Tama ba segunda parte, AD SLB Laulara la muda nia estratéjia. Ekipa ne’e kontinua domina bola no aumenta presaun ba Emmanuel F.C, hodi obriga adversáriu atu joga liu iha área defeza rasik.

Esforsu jogadór sira AD SLB Laulara nian ikus mai fó rezultadu iha minutu 65, bainhira defeza Emmanuel F.C komete erru hasoru atakante Italo Suares iha grande área.

Árbitru deside penalti ba ekipa Makikit Laulara. Italo Suares rasik ne’ebé sai ezekutador ba penalidade refere susesu hala’o nia servisu ho di´ak hodi marka golu no muda score ba 1-0.

Ho score refere tensi jogu komesa manas liután ba ekipa rua ne’e hodi lansa kontra atake ba malu maibé to’o termina jogu segunda parte score mantein 1-0 vitóri ba ekipa AD SLB Laulara.

Husi rezulatadu vitória ne’e lori ekipa AD SLB Laulara ukun provizoriu tabela klasifikasaun Liga Timorense Primera Divizaun ho pontus 16 husi jogu neen.

Ekipa Makikit Laulara rekolla vitória lima no empata ida. Enkuantu ekipa Emmanuel F.C mantein iha pozisaun da-haat ho pontu 10 husi jogu neen, manan dala-tolu, empata ida no derota rua.

Jornalista: Davilio Valdemir/Editór: Vito Salvadór