AD SLB Laulara Besik Liután Ba Títulu Kampiaun Hafoin Manán Coração F.C 4-0

Ekipa SLB Laulara. Imajen/LFTL

Díli, 17 Jullu 2026 (RAFA.TL)- Ekipa AD SLB Laulara besik liután ba títulu kampiaun Liga Timorense époka ne’e hafoin manán adversáriu Coração F.C ho score 4-0 iha jornada da-ualu, ne’ebé hala’o iha Estádiu Munisipál Díli, Sesta-ne’e.

Desde inisiu jogu priemeira parte AD SLB Laulara domina kedas bola no lansa atake maka’ás ba ekipa Coração F.C husi liña ba liña.

Tama ba iha minutu 17, AD SLB Laulara susesu lidera uluk ho score 1-0 liu husi golu Mouzinho Barreto de Lima.

Ho score refere halo tensi jogu komesa manas liután ba ekipa rua hodi lansa kontra atake ba malu ,maibé ekipa AD SLB Laulara ne’ebé mak domina liu bola aumenta intensidade atu buka aumenta golu.

Ekipa Coração F.C mantein hametin liña defensiva ne’ebé forte ho nune’e to’o intervallu score mantein 1-0.

Tama iha segunda parte, AD SLB Laulara hatudu dominasaun total iha lala’ok jogu. Ekipa ne’e kontinua halo presaun no ataka beibeik, hodi halo ekipa adversáriu Coracão FC ladún iha oportunidade atu dezenvolve sira nia jogu, ho nune’e, tama ba iha minutu 63 Serafim Brito susesu produs golu ida hodi muda score ba 2-0.

Lidera ona ho score 2-0 la muda ritmu jogu ekipa Makikit Laulara hodi kontinua sira nia dominasaun no tama ba iha minutu 66, Jhon Frith susesu produs tan golu ida hodi aumenta score sai 3-0.

Ho score refere obriga ekipa Curaçao F.C sai husi zona no tenta lansa kontra atake hodi buka oportundade atu hamihis score, maibé tama ba iha minutu 90+5 kontra atake lais husi ekipa SLB liu husi futebolista Italo Soares halo liña defeza husi Coração F.C lakon kontrolu ikus mai komete erru iha grande área no arbitu deside penalti ba ekipa SLB Laulara.

Italo Soares ne’ebe mak sai ezekutadór ba penalidade refere susesu fura rede Coracão FC hodi aumenta score ba 4-0 to’o termina jogu segunda parte vitoria ba AD SLB Laulara.

Ho vitória boot ida-ne’e, SLB hametin nia pozisaun iha priemeiru klasifikasaun Liga Timorense Primeira Divizaun époka 2026 no hakbesik liután ba títulu kampeaun.

AD SLB Laulara rekolla ona pontu 22 husi jogu ualu, manán hitu no empata ida no seidauk sofre derrota.

Enkuantu  Coração F.C mantein iha pozisaun da-lima tabela klasifikasaun provizóriu ho pontu sia husi rezulatadu manan tolu no lakon lima.

Liga Timorense rasik hela de’it jornada ida atu remata. Iha jornada ikus, AD SLB Laulara sei hasoru adversáriu Aitana F.C iha jogu ida ne’ebé bele determina ofisialmente konkista AD SLB Laulara nian ba títulu Liga Timorense Primeira Divizaun époka 2026.

Jornalista: Davilio Valdamir/Editór: Vito Salvadór