AD Santo António Promovidu Ba Primeira Divizaun Hafoin Festa Golu Ba Rede Fiel F.C

Ekipa Santo António fo FIEL F.C

Díli, 12 Juñu 2026, (RAFA.TL)- Ekipa AD Santo António promovidu ba primeira divizaun hafoin manan Fiel F.C ho score fantasiku 7-0 iha jogu kontinuasaun Liga Timornse segunda divizaun époka 2026.

Jogu ikus ekipa rua iha grupu A, segunda divizaun ne’e, ne’ebé hala’o iha  Estádiu Munisipál Díli, Kinta (11/06/2026), ekipa rua hatudu jogu ne’ebé furak iha kampu hodi anima adeptu futeból lovers sira ne’ebé asiste direta jogu refere.

Ekipa AD Santo António ne’ebé treina hosi treinadór, Eduardu Perreira, konsege hatudu ritmu jogu di’ak hodi domina liu bola, no tama ba iha minutu 26 avansadu Silveiro Garcia produz golu ida hodi lori nia ekipa AD Santo António lidera ho score 1-0.

Tama ba iha minutu 30, Olagar Xavier produs tan golu ida hodi aumenta score ba 2-0 no ho golu ne’e tensi jogu kontinua aas ba ekipa rua ne’e hodi lansa kontra atake ba malu, maibe to’o termina jogu primeira parte score 2-0 mantein la muda.

Kontinua ba jogu segunda parte tensi jogu kontinua aas ba ekipa rua ne’e hodi lansa kontra atake malu. Nune’e tama ba iha minutu 58, AD Santo António hetan penalti hafoin hand ball iha grande área.

Luis Figo ne’ebé sai ezekutór ba penalidade refere susesu halao nia responsablidade ho di’ak hodi haboot liu tan score ba 3-0.

Lidera ona ho score 3-0 la muda ritmu jogu ekipa AD Santo António ho nune’e tama ba iha minutu 68 Olegar Xvier susesu aumenta tan golu ida hodi hasae score ba 4-0.

Liu deit minutu haat, Olegar Xavier marka tan nia naran hodi haboot liu tan score ba 5-0.

Ho score refere ekipa Fiel F.C nafatin esforsu no tenta atu responde golu maibe guarda defensivu hosi ekipa AD Santo António mantein solidu hodi la fo fatin ekipa Fiel F.C hodi marka golu.

Tama ba iha minutu 88, ekipa Fiel kontinua sofre tan golu liu hosi asaun futebolista Olagar Xavier hodi haboot liu tan score ba 6-0.

Liu deit minutu rua Januario da Silva konsge aumenta tan golu ida hodi haboot liu tan score ba 7-0 hodi termina jogu segunda parte vitoria ba AD Santo António.

Hosi rezultadu vitória ne’e lori ekipa AD Santo António kampeaun grupu A ho pontu 12 hosi jogu haat; manan hotu, no promovidu ba primeira divizaun, enkuantu ekipa Fiel F.C mantin iha segundu divizaun ho pontus hitu.

Jornalista: Davilio Valdemir/Editór: Vito Salvadór