AD Santo Antonio Halakon Hibers Díli F.C iha Penalidade no Kampiaun Liga Timorense Segunda Divizaun Époka 2026

AD Santo Antonio, kampiaun Liga Timorense Segundu divizaun époka 2026 .

Díli 02 Jullu 2026 (RAFA.TL)- Ekipa Futeból Polísia Nasionál Timor-Leste (PNTL), AD Santo Antonio susesu sai kampiaun Liga Timorense Segundu divizaun époka 2026 hafoin halakon nia adversáriu Hibers Díli F.C liu husi penalidade ho score 4-2, hafoin iha tempu normal no adisional ekipa rua empata.

Iha jogu entre ekipa rua ne´ebé halao iha Estádiu Munisipál Díli, Kuarta (01/07/2026),  ekipa rua hatudu jogu ida ho kualidade no agresivu ho ambisaun forte hakarak marka uluk golu hodi lidera tabela score ne´ebé iha.

AD Santo Antonio hetan uluk oportunidade iha minutu 20 liuhusi Jogadór Adelino de Oliveira ne’ebé lori bola husi liña sorin no halo kruza ba area defeza adversáriu no simu husi Silveiro Garcia liuhusi Nia Cabesada, maibé bola sei bele defende husi guarda rede Hibers Díli F.C nian.

Tama ba minutu 34 Hibers Díli F.C mós responde liu husi kontra atake lais ida hodi halo ameasa hoi bola falta ne´ebé ezekuta husi jogadór Gabriel Ati no aproveita husi nia kompatriota  Cristovao de Carvalho hodi halo kabesada ida maibé guarda rede AD Santo Antonio sei bele antispa ho Diak.

AD Santo Antonio hetan tan oportunidade briliante iha minutu 39, liu husi jogadór Olegar Xavier ho individu hodi lori tama ba grande área adversáriu no pasa ba Silveiro Garcia no kontinua kedas lansa suta maka’ás, maibé bola sei kona besi-rin. Ekipa rua kontinua tenta hodi buka oportunidade liuhusi Sira teknika no tatika ne´ebé iha,  maibe to primeira parte ramata score nafatin 0-0.

Kontinua ba segunda parte, AD Santo Antonio halo jogu ida ho agresivu liután no jogadór Luis Figo ne´ebé lori bola mesak tama ba liña defeza Hibers Díli F.C no lansa suta makas maibé sei bele defende husi guarda rede Ricardo Soares.

Ekipa rua kontinua halo jogu ho balansu, maske halo kontra atake ba malu makas maibé la iha golu ruma akontese no ekipa rua mantein ho score ne´ebé iha too tempu segunda parte termina.

Hafoin jogu minutu 90 tempu normal nia termina ekipa rua ho konkordansia hamutuk ho arbitu no orgaun liga deside laiha tan tempu adisional no hakat direitamente ba penalidade no iha faze penalidade, ekipa AD Santo Antonio marka golu haat liu husi Luis Figo, Emanuel Akelew, Anizo Correia, Sandro Quintao enkuantu jogadór Olegar Xavier falla iha ezekusaun. Enkuantu ekipa Hibers Díli F.C marka deit golu rua liu husi Anggisu Barbosa no Joanico Feraons no jogadór Cristovao de Carvalho no Denilson Soares falla iha ezekusaun ho nune´e ekipa AD Santo Antonio mak sai vensedor ho score 4-2 hodi hetan titulu kampiaun ba Liga Timorense Segunda Divizaun époka 2026.

Ho vitória ne´e, AD Santo Antonio ne´ebé hetan titulu kampiaun segunda divizaun époka 2026 hetan medalla no Tasa rotativa inklui Osan ho montante $ 10,000.00.

Enkuantu, Top Score Segunda Divizaun époka 2026 monu ba jogadór  Arberty Yohanes Tefa ho golu hitu no hetan premiu Osan $ 500,00.

Jornalista: Marito da Costa/Editór: Vito Salvadór