Desporto

AD BAS Halo Remontada no Halakon AS Jerman ho Score 6-4

todayNovember 11, 2026 13

Background
share close

Díli, 11 Novemberu 2026 (RAFA)- Ekipa asosiasaun desportiva Baucau All Star (AD BAS) susesu rekolla pontu tolu hafoin halo remontada espetakular hasoru nia adversáriu As Jerman ho score 6-4 iha jogu kontinuasaun Liga futsal primeira divizaun époka 2026 ne´ebé hala´o iha kampu futsal F-FDTL iha Díli, Tersa-ne’e.

Desde inísiu jogu, ekipa rua hatudu ambisaun boot hodi buka rezultadu pozitivu atu hadi’a sira-nia pozisaun iha tabela klasifikasaun. Jogu foin hala’o minutu ida, AD BAS konsege loke uluk konta golu liu husi jogador John Figo, hodi muda rezultadu sai 1-0.

Golu inisiál ne’e halo intensidade jogu aumenta, ho ekipa rua kontinua lansa kontra-atake ba malu. Maibé, AS Jerman ne’ebé hatudu tranzisaun no movimentu lalais konsege responde ho maka’ás, hodi marka golu haat tuir malu liuhusi Swengli Nessa iha minutu tolu, Lucio Soares iha minutu lima, Paulo Soares iha minutu hitu no Rene Scurial iha minutu sia.

Rezultadu ne’e muda score sai 4-1 ba vantagem AS Jerman. Maski enfrenta situasaun difísil, AD BAS la deziste no kontinua buka oportunidade atu hamenus diferensa golu. Esforsu ne’e fó rezultadu bainhira Anzar konsege marka golu iha minutu 18, hodi taka parte dahuluk ho rezultadu 2-4.

Tama ba segunda parte, AD BAS ne’ebé sofre golu haat iha parte dahuluk hahú aumenta presaun ba AS Jerman, liuhusi organizasaun di’ak iha atake no defensivu hodi buka oportunidade atu muda rezultadu.

Estratéjia ne’e hatudu rezultadu pozitivu ba AD BAS, ne’ebé konsege marka golu haat tan iha parte daruak. Anzar loke fali konta golu iha minutu 21, tuirmai Celcio Soares iha minutu 26, Putra iha minutu 28 no Celcio Soares marka fali tan iha minutu 33.

Golu haat ne’e muda rezultadu husi 2-4 sai 6-4 ba vantagem AD BAS, ne’ebé konsege halo remontada espetakulár hafoin hahú jogu ho pozisaun kotuk.

Maski iha minutu ikus ekipa rua kontinua buka oportunidade liuhusi kontra-atake, maibé to’o apitu naruk la iha tan golu ruma ne’ebé konsege muda rezultadu. Ho nune’e, AD BAS manan ho rezultadu finál 6-4.

Rezultadu vitória ne’e hatuur AD BAS provizoriamente iha pozisaun da-hitu tabela klasifikasaun ho pontu 15, husi jogu ualu ho rejistu vitória lima no derrota tolu. Enkuantu AS Jerman kontinua hela iha pozisaun 12 ho pontu tolu husi jogu ualu ho rejistu vitória ida no derrota hitu.

Jornalista: Davilio Valdamir/Nelson Dias

 

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!