Noticias

Halibur Alumni Interkámbiu EUA-TL Hametin Rede no Kooperasaun Bilaterál

todayNovember 20, 2026 3

Background
share close

Díli, 20 Novembru 2026 (RAFA) – Embaixada Estadus Unidus Amérika (EUA) iha Timor-Leste (TL) organiza Konferénsia Alumni Interkámbiu EUA-TL 2026  halibur antigu alunu na’in-100 resin.

Alumni ne’ebé partisipa ona iha programa interkámbiu oioin husi EUA atu  hametin ligasaun, harii rede profisionál no selebra kontribuisaun husi komunidade alumni ba dezenvolvimentu Timor-Leste.

Programa interkámbiu hirak ne’ebé reprezenta iha eventu ne’e inklui Fulbright, Young Southeast Asian Leaders Initiative (YSEALI), International Visitor Leadership Program (IVLP) no Global Undergraduate Exchange Program (Global UGRAD).

Konferénsia Alumni Interkámbiu EUA-TL 2026 ho objetivu atu harii rede sustentável entre profisionál Timoroan sira, reforsa kooperasaun no hametin relasaun bilaterál entre TL  no EUA.

Liu husi atividade ne’e, Misaun EUA mós reafirma ninia kompromisu atu kontinua investe iha dezenvolvimentu síviku no profisionál husi antigu alunu sira, ne’ebé sai parte importante husi kooperasaun entre nasaun rua.

Konferénsia loron ida-ne’e hahú ho liafuan boas-vindas husi Enkarregadu Negósius Embaixada EUA, Bruce Begnell, no kontinua ho diskursu prinsipál husi João Mariano Saldanha, ne’ebé mak antigu alunu Fulbright dahuluk husi TL.

Durante konferénsia, partisipante sira mós partisipa iha diskusaun painél no sesaun grupu (breakout sessions) ne’ebé foka ba asuntu dezenvolvimentu profisionál no dezafiu foun iha merkadu traballu.

Asuntu importante ne’ebé hetan atensaun iha diskusaun hirak ne’e inklui seguransa sibernétika no intelijénsia artifisiál, nu’udar área importante sira ne’ebé presiza dezenvolve atu responde ba mudansa no nesesidade iha mundu servisu kontemporáneu.

Diretór Diplomasia Publiku, Dominick Tao afirma katak programa interkámbiu sai nu’udar instrumentu importante ida atu hametin relasaun diplomátika, harii parseria no dezenvolve lideransa iha Timor-Leste, liuhusi oportunidade edukasaun no kooperasaun entre nasaun rua.

Nia esplika katak durante tinan 20 resin, hahú hosi TL nia independénsia, Governu EUA kontinua haree programa interkámbiu nu’udar núkleu importante ida atu hametin relasaun no dezenvolve parseria ho TL.

Dominick Thao konsidera katak konferénsia ne’e iha importánsia boot tanba reúne antigu alunu sira hosi programa interkámbiu oioin iha fatin ida, la’ós de’it fó oportunidade ba Embaixada EUA atu interaje ho sira. Maibé, mós atu harii ligasaun no kolaborasaun entre antigu alunu sira rasik.

“Objetivu prinsipál hosi eventu ida-ne’e mak atu liga, fó kbiit no inspira. Ho talentu, edukasaun no kapasidade lideransa ne’ebé antigu alunu sira iha, ami fiar katak sira bele halo buat barak ba dezenvolvimentu Timor-Leste,” hatete Dominic Thao iha otél Novo Turismo, Sesta-ne’e.

Nia hatutan , Estadus Unidus durante ne’e fó ona oportunidade barak ba sidadaun Timor-Leste atu partisipa iha programa interkámbiu, inklui oportunidade atu dezenvolve koñesimentu, kapasidade no esperiénsia lideransa.

Diretór Diplomasia Publiku konsidera katak antigu alunu sira hosi programa interkámbiu EUA iha papél importante iha sosiedade TL, tanba balun okupa ona pozisaun estratéjika iha instituisaun públika no organizasaun sira, inklui prezidente instituisaun no eis-membru Governu.

Tanba ne’e, nia subliña katak eventu hanesan konferénsia alumni ne’e importante tebes atu kontinua hametin ligasaun entre antigu alunu sira, promove partilla esperiénsia no inspira jerasaun foun atu kontribui ba nasaun nia dezenvolvimentu.

Iha fatin hanesan, almuni estudante ba programa ne’e, Florentino Soares Ferreira, sente priviléjiu tanba hetan oportunidade ida-ne’e.

Nia haree katak oportunidade ne’ebé fó mai Timoroan sira-ne’e la’ós atinjimentu pesoal de’it, maibé ne’e reponsabilidade ida atu bele kontribui ba dezenvolvimentu iha Timor.

“Ha’u fiar ba oin ita iha relasaun Diplomata di’ak nafatin ho estadu Estado Unidus no fó oportunidade di’ak nafatin ba Timor barak hodi fila lori matenek kbiit tomak ne’ebé mak sira hetan lori mai hodi dezenvolve fali ita-nia rai”,tenik Almuni ne’e.

Nia mos hato’o  agradese ba governu EUA ba oportunidade ne’ebé fó Timor oan hotu, tanba husi oportunidade ida-ne’e iha Timor oan lubuk ne’ebé okupa papel importante iha estadu Timor-Leste.

Jornalista: Cesarina de Carvalho

 

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!