Ouvir RAFA Ritmo, Voz e Coração de Timor
Díli, 20 Novembru 2026 (RAFA)- Organizasaun feto hamutuk ho grupu sosiedade sivíl, estudante sira, populasaun feto no mane, Sesta-ne’e, konsentra iha Jardin 05 de Maio, Colmera, Díli, hala’o Marsa Popular ho tema “Harahun Silénsiu, Labele Ignora Tán Violensia,”.
Marsa popular ne’ebé akompaña mós husi fundador RDTL, Mari Alkatiri, ho objetivu fó solidariedade ba matebian Palomita Gusmão Guterres no feto maluk sira seluk ne’ebé mak sai ona vitima ba aktu violénsia to’o lakon vida.
Prezidente Komisaun Organizadora, Zelia Fernandes liuhusi nia intervensaun hatete, marsa Popular ida-ne’e mosu tanba akompaña kazu femisídiu ne’ebé númeru boot tebes iha sosiédade Timorense ne’ebé sai preokupante ba sosiedade feto sira tanba sente moris la seguru.
Nia fundamenta meius ida-ne’e hanesan enkuadramentu legál oin-oin ne’ebé mak fó biban ba atu labele hamutuk reforsa iha protesaun no asisténsia, maibé tenke kontinua haré katak feton labarik, inan-feton sira, oan feton sira kontinua sofre ho situasaun violensia nian.
“Komisaun organizadora ho espontaneamente organiza marsa ida-ne’e atu bele fó hanoin ba ita hotu-hotu, atu oinsá mak iha konsiénsia, maibé oinsá mak ita harahun silénsiu hodi labele ignora tan violénsia. Ita labele hanoin katak silénsiu ne’e mak solusaun. Ita mós labele hanoin katak violénsia mak mudansa kultura ida. Ita tenke tempu ona harahun silénsiu liu-liu ita tenke tau apoiu no ajuda ita-nia maluk sira nu’udár prinsípiu importante hosi sosiedade Timorense,” hatete Zelia Fernandes.
Komisaun organizadora ba marsa ne’e kompostu hosi organizasaun feton sira, organizasaun sosiedade sivíl, organizasaun direitu umanu nian mai hamutuk iha movimentu ida-ne’e, ne’ebé hanaran movimentu advokasia ba violensia bazeia ba jéneru.
Nia afirma depois remata marsa popular iha Sabadu, 21 Novembru-ne’e, kontinua halo reflexaun iha Largo Lecidere, depois remata atividade Marsa popular Organizasaun Feto sira mós sei halo petisaun isa hodi entrega ba orgaun Estadu nian liuliu kona-ba violensia hasoru feto.
Iha Marsa Popular ne’e partisipa mós organizasaun ALFELA, JSMP, AJAR, JU,S no mós organizasaun sira seluk, no hetan seguransa másimu husi Polísia Nasional Timor-Leste (PNTL).
Rota marsa popular ne’e husi Jardim 05 de Maiu, ba iha Sumafro Kolmera, Kuartel Jerál PNTL, Parlamentu Nasionál, Palásiu Governu no mós Largo Lecidere.
Komunidade no estudante sira ne’ebé partisipa iha Marsa Popular ne’e maiória sira kaer panfletu ho imajen matebian Palomita Gusmão no vitima sira seluk ne’ebé lakon ona vida tanba hetan violénsia husi mane sira.
Jornalista: Zita Menezes
Written by: RafaFM
Estudante no populasaun Hala’o Marsa Popular Fó Advokasia Kombate Violénsia Hasoru Feto Organizasaun Feto
todayNovember 20, 2026 3 2
Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.
Copyright Rafa.tl - Desenvolvido por Justweb.pt