Noticias

IDN Fasilita Formasaun Ba Membru F-FDTL no PNTL Kona-bá Seguransa Marítima

todayNovember 19, 2026 18

Background
share close

Díli, 19 Novembru 2026 (RAFA)-Institutu Nasionál Defeza (IDN), Kinta-ne’e iha Salaun Ministériu Defeza, fasilita formasaun ba membru Polísia Nasionál Timor-Leste (PNTL) ho FALINTIL-Frosa Defeza Timor-Leste (F-FDTL) kona-bá segueransa marítima.

Diretór Interinu IDN, Nuno Manuel Corvelo de Andrade Sarmento, hatete objetivu husi formasaun ne´e atu fahe koñesimentu no esperiénsia kona-bá defeza no seguransa, liuliu iha área jeopolítika marítima.

Nia esplika katak atividade formasaun ne’e importante atu prepara membru sira hodi iha komprensaun kle’an no kapasidade téknika atu enfrenta dezafiu seguransa ne’ebé bele mosu iha futuru.

“Instituisaun sira ne’ebé iha responsabilidade kona-bá seguransa no defeza bele fahe koñesimentu ho ofisiál sira ne’ebé iha responsabilidade iha área ne’e, atu aumenta komprensaun kle’an kona-ba defeza no seguransa, liuliu iha espasu jeopolítiku marítimu,” hatete Diretór Interinu IDN Nuno Manuel Corvelo de Andrade Sarmento.

Iha parte seluk, Komandante Komponente Navál F-FDTL, Komodoro Higino das Neves, hatete kooperasaun entre F-FDTL, liuliu Komponente Navál, no PNTL, liuliu Unidade Polísia Marítima, presiza kontinua hametin.

“Importante atu superviziona atividade hotu-hotu ne’ebé hala’o iha tasi no kordena malu, atu bele hala’o operasaun ho efikásia no susesu. Ami ho PNTL koordena ona atu iha loron ida kria forsa-tarefa permanente entre Unidade Polísia Marítima no Komponente Navál, hodi implementa misaun iha terenu. Komandu rua ne’e sei kontribui ho meius, ekipamentu, materiál no rekursu umanu atu hala’o misaun ne’e,” hatete Komandante Komponente Navál F-FDTL, Komodoro Higino das Neves.

Komodoro ne´e hatutan maski rekursu no fasilidade ne’ebé iha seidauk barak, Komponente Navál iha ró Betano no ró Jaco ne’ebé agora hala’o hela patrullamentu no kontrolu iha tasi bele garante prevene no kombate atividade ilegál iha área marítima.

Komandante Komponente Navál mós klarifika iha loron hirak liubá, ekipa konjunta konsege deteta movimentu no atividade suspeitu ne’ebé hatama sasán illegal nomos asegura  suspeitu na’in tolu iha área Krištu-Rei.

Jornalista: João Carlos

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!