Ouvir RAFA Ritmo, Voz e Coração de Timor
Dirijente másimu husi Autoridade Nasionál Petróleu (ANP), Autoridade Nasionál Minerais (ANM) no TIMOR GAP, E.P., aprezenta potensia no oportunidade investimentu iha setór enerjia no rekursu naturais Timor-Leste nian ba investidór internasionál sira iha forum Díli Internasionál Trade Expo, Tersa 17 Novembru 2026.
Díli, 18 Novembru 2026 (RAFA) – Dirijente másimu husi Autoridade Nasionál Petróleu (ANP), Autoridade Nasionál Minerais (ANM) no TIMOR GAP, E.P., aprezenta potensia no oportunidade investimentu iha setór enerjia no rekursu naturais Timor-Leste nian ba investidór internasionál sira iha Forum Díli Internasionál Trade Expo, Tersa-ne’e.
Sesaun painél ne’e realiza liuhusi konvite husi Ministériu Komérsiu no Indústria (MCI) hodi diskute no fahe informasaun kona-bá atividade petrolífera no mineirais iha rai-laran iha kontestu kooperasaun rejionál ASEAN nian.
Iha aprezentasaun Prezidente ANP, Gualdino do Carmo da Silva, foka liubá projetu refinaria, prosesamentu mina no gás, inklui oportunidade investimentu iha setór downstream no upstream.
Nia esplika katak atividade downstream kobre abastesimentu kombustível no oportunidade negósiu iha rai-laran, enkuantu upstream inklui peskiza, dezenvolvimentu, preparasaun ba produsaun, no prosesu sira ne’ebé sei la’o hela iha kampu Bayu-Undan.
“Iha pasu sira tuirmai ne’ebé ita presiza atu servisu besik ho ita-nia membru hotu-hotu no sentru enerjia nian, hodi garante katak Timor-Leste la’ós de’it hetan benefísiu husi adezaun ba ASEAN, maibé mós kontribui ba diskusaun sira kona-bá seguransa no tranzisaun enerjétika,” tenik Prezidente ANP Gualdino do Carmo da Silva.
Iha fatin hanesan, Prezidente ANM aprezenta kona-bá mapa bloku minerais sira no mekanizmu parseria ho empreza estatál Murak Rai Timor (MRT).
Nia subliña importánsia atu aprende husi esperiénsia no padraun nasaun membru ASEAN sira seluk iha setór enerjia no mineiru.
“Husi setór mineiru, saida mak oportunidade sira ne’ebé ita bele kaptura atu ajuda dezenvolvimentu. Ha’u komprende ita hakarak kompete ho ASEAN, maibé iha faze ida-ne’e, realistikamente ita presiza servisu hamutuk hodi aproveita ita-nia kapasidade atu sai kompetitivu iha futuru,” subliña Prezidente ANM.
Prezidente TIMOR GAP, E.P., Domingos Lequisiga Maria, aprezenta estratéjia parseria iha área esplorasaun no konvida investidór internasionál sira atu hamutuk ho kompañia petrolífera nasionál ne’e hodi esplora bloku foun sira.
Nia hateten kooperasaun ho kompañia petrolífera nasionál (NOC) husi nasaun sira seluk loke dalan ba programa oioin, liuliu iha área partilla informasaun no dezenvolvimentu rekursu umanu.
“Xave importante mak fahe informasaun, harii kapasidade, no kria oportunidade investimentu ne’ebé ita bele liga ba. Nune’e, ita bele oferese duni oportunidade sira ne’ebé Timor-Leste iha hodi halo parseria no atrai investimentu mai iha nasaun ne’e,” Domingos koklui.
Jornalista: Remigia Locatalli
Written by: RafaFM
ANM ho TIMOR GAP Aprezenta Investimentu Enerjia no Minerais Ba Investidór Internasionál ANP
todayNovember 20, 2026 11 2
Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.
Copyright Rafa.tl - Desenvolvido por Justweb.pt