Noticias

Estabilidade Polítika no Diplomásia Sai Kbiit Atu Atrai Investimentu Estranjeiru

todayNovember 17, 2026 22

Background
share close

Abu Dhabi, 17 Novembru 2026 (RAFA)- Prezidente Repúblika, José Ramos-Horta hateten, estabilidade polítika, konfiansa internasionál no relasaun diplomátika ne’ebé forte sai fatór importante atu atrai investimentu estranjeiru ba Timor-Leste.

Xefe Estadu hato’o deklarasaun ne’e durante vizita Estadu ba Emiradu Árabe Unidu (EAU) hodi dehan katak rezultadu pozitivu ne’e la’ós akontese de’it tanba vizita ida, maibé rezultadu husi esforsu diplomátiku no relasaun pesoál ne’ebé harii durante tinan barak.

Ramos-Horta esplika, relasaun ho Abu Dhabi hahú ona besik tinan 20 liubá, durante nia servisu nu’udar Ministru Negósiu Estranjeiru, no kontinua hametin fali bainhira nia asume kargu Prezidente Repúblika.

“Estabilidade polítika relasaun instituisionál hanesan Prezidente, Governu, Parlamentu la’o di’ak ka la’e, tanba buat sira ne’e mak sira hotu-hotu sukat, sira bele iha konfiansa atu halo investimentu. Investimentu la’ós de’it investimentu komersiál baibain ita temi ne’e, investimentu diplomátiku, investimentu polítiku,” hatete Prezidente Repúblika José Ramos-Horta iha Abu Dhabi, Segunda-ne’e.

Prezidente Ramos-Horta mós konsidera, adezaun Timor-Leste ba ASEAN nu’udar konquista importante ne’ebé reflete progresu diplomátiku no estabilidade nasionál.

Xefe Estadu Timor-Leste ne’e lembra katak, krize polítika 2006 no instabilidade iha períodu 2012–2022 afeta kredibilidade nasaun nian iha komunidade internasionál.

Tuir Ramos-Horta, esforsu atu harii fali konfiansa internasionál envolve hametin relasaun ho Austrália, Indonézia, nasaun ASEAN, Uniaun Europeia, Estadus Unidus, Xina, Korea do Sul, Japaun no nasaun sira seluk.

Maske nune’e, Prezidente Ramos-Horta  alerta katak, Timor-Leste dala barak rasik sai obstákulu ba oportunidade investimentu tanba falta seguimentu ba kompromisu ne’ebé halo durante vizita diplomátika.

Nia argumenta, dala barak ko’alia no halo vizita, buat hotu la’o di’ak, maibé depois vizita la iha seguimentu husi Governu. Ne’e mak atraza buat barak.

Tanba ne’e Ramos Horta husu Governu atu hametin koordenasaun no responsabilidade institusionál, atu oportunidade diplomátika no interese investidór internasionál sira bele transforma ba rezultadu konkretu ba dezenvolvimentu Timor-Leste.

Jornalista: Cristina Ximenes

 

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!