Noticias

Dosente Tenke Hala’o Knaar ho Responsabilidade Prepara Jerasaun Ba Futuru

todayNovember 17, 2026 8

Background
share close

Díli, 17 Novembru 2026 (RAFA)-Reitór Universidade Nasionál Timor Lorosa’e (UNTL), Joviano António da Costa, husu ba dosente sira hotu iha UNTL atu hala’o knaar ho responsabilidade boot, dedikasaun, dignidade, fraternidade, umanidade no sai ezemplu di’ak, hodi prepara jerasaun futuru Timor-Leste ho kualidade aas.

Reitór UNTL hato’o apelu ne’e hodi enkoraja dosente sira atu mantein personalidade no profisionalizmu iha fatin servisu, hodi hetan respeitu no evita hahalok sira ne’ebé bele lori risku ba sira-nia an rasik.

Nia subliña katak kontribuisaun, dedikasaun no sakrifísiu dosente sira nian ba UNTL tenke hetan apresiasaun husi estudante, alumni no komunidade Timor-Leste tomak.

Maski dala-ua’in  dosente sira konsidera hanesan erói ne’ebé la hetan rekoñesimentu adekuadu. Maibé, tuir reitór UNTL ne’e katak, pelu menus dosente labele hetan tratamentu aat, kondenasaun ka insultu husi ema sira ne’ebé la valoriza sira-nia kontribuisaun.

“Edukasaun mak xave ba dezenvolvimentu, no dosente sira mak sai autór prinsipál iha prosesu edukasaun, liuliu iha nivel ensinu superiór. Responsabilidade ba dezenvolvimentu nasaun nian, indireitamente, mai husi profesór sira, tanba sira mak forma profisionál no ajente dezenvolvimentu iha futuru,” hatete reitor UNTL iha ámbitu aniversáriu UNTL ba dala-26, Tersa-ne’e, iha kampus sentrál, Díli.

Nia hatutan profisionál sira iha área oioin, hanesan enjenéiru, doutór, juis, advogadu, jestór, kontabilista, polítiku, sientista no mós dosente futuru, hotu-hotu liu husi prosesu formasaun iha universidade.

Reitór UNTL husu ba dosente sira atu orgullu ho sira-nia profisaun hanesan edukadór iha UNTL, tanba liuhusi hanorin, orientasaun no akompañamentu ne’ebé sira fó, bele forma ema matenek no intelektuál sira atu garante sustentabilidade nasaun Timor-Leste nian iha futuru.

Reitór Joviano António da Costa mós apela ba estudante sira atu orgullu tanba hetan oportunidade atu estuda iha UNTL, konsidera katak la’ós estudante hotu iha Timor-Leste mak iha oportunidade atu asesu ba universidade ne’e.

Nia enkoraja estudante sira atu aproveita didi’ak oportunidade ne’ebé sira hetan, aprende ho seriedade, estuda maka’as no halibur koñesimentu ne’ebé natoon atu uza ba sira-nia futuru.

Nia mós relata katak susesu estudante nian sai orgullu boot ba dosente sira, no la iha dosente ida mak hakarak haree estudante ne’ebé nia orienta la konsege hetan susesu.

“Prepara imi-nia futuru ho didi’ak hahú husi agora, tanba futuru hahú husi agora. Labele lakon tempu, se lae, imi sei arrepende iha futuru. Estuda, aprende ho imi-nia dosente sira, respeita no dignifika sira. Tanba, dosente sira mós sai hanesan inan-aman daruak ba imi iha kampus,” tenik Joviano António da Costa

Reitór UNTL mós husu atu kria ambiente kampus ne’ebé seguru, konfortável, saudável no hakmatek, hodi garante kualidade graduadu sira ne’ebé UNTL forma ho nesesidade dezenvolvimentu Timor-Leste no ASEAN.

Jornalista: Cesarina de Carvalho

 

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!