Ouvir RAFA Ritmo, Voz e Coração de Timor
Lider balu nia oan hamutuk ho membru F-FDTL ida alegadamente envolve iha tama sigaru ilegál iha área tais Kristu Rei, Tersa-dadeer, 17 Novembru 2026.
Díli, 17 Novembru 2026 (RAFA)— Komandante Jerál Polísia Nasionál Timor-Leste (PNTL), Komisáriu Asistente Polísia Afonso dos Santos, Tersa-ne’e, tun direta ba edifisiu Diresaun Servisu Investigasaun Kriminál (DSIK) hodi haree no konfirma sigaru ilegál ho marka Marlboro hamutuk karton 149 ne’ebé ekipa konjunta halo apreensaun iha área Kristu-Rei, Díli, ne´ebé alegamente líder balu nia oan, hamutuk ho membru FALINTIL-Forsa Defeza Timor-Leste (F-FDTL) na’in-ida hatama illegalmente.

Komandante Jerál PNTL kondena maka’ás aktu autór sira ne´ebé hatama sasán ilegál ne;e no husu tenke kaer sira no lori prosesu ne’e ba oin tuir lei ne´ebé vigora, atu ba oin, labele akontese tan hahalok sira ne’ebé lori prejuizu ba Estadu no risku ba sidadaun sira.
“Asuntu sira hanesan ne’e la’ós uza katuas sira-nia naran, katuas sira ne’e lakohi haree buat sira-ne’e, ne’e atetude la di’ak, Haree sasán sira-ne’e halo apreensaun hotu, lalika ko’alia barbarak, orsida katuas sira mak kona fali,” Komisáriu Asistente Polísia Afonso dos Santos afirma.
Iha fatin hanesan, Xefe Operasaun Konjunta José Sarmento Freitas haktuir apreensaun akontese iha madrugada tuku 03:00 OTL iha área Kristu-Rei.
“Ohin madrugada, hale’u tuku 03:00 OTL, ekipa vizilánsia operasaun konjunta halo monitorizasaun, halo observasun no halo atuasaun ba merkadoria ilísitu hanesan sigaru ne’ebé ró ilegal husi tasi-laran mai iha área Kristu-Rei nian no konsege ekipa halo apreensaun bá merkadoria ilísitu sira sigaru marka Marlboro,” informa Xefe Operasaun Konjunta José Sarmento Freitas ba jornalista sira.
Liuhusi konferénsia imprensa iha Komandu Jerál PNTL, Superintendente-Xefe Polísia João Belo dos Reis nu’udar protavós PNTL, konfirma katak iha operasaun ne’e konsege deteta sidadaun Timor-Leste na’in-neen; na’in-tolu konsege halai no kaptura na’in-tolu iha fatin ne’ebé halo hela kontra bandu ba merkadu ilísitu hanesan sigaru ho marka Marlboro ho kuantidade karton 149.
“Ita bele hato’o katak sira na’in-neen ne’ebé mak ita deskonfia envolve kontra bandu ne’e mai husi família koñesidu balun, no membru instituisaun balun ne’ebé agora dadaun prosesu identifikasaun la’o. Depois nia prosesu tomak karik posivel, ami sei públika ba maluk sira bainhira hetan ona ninia verdade,” hatete Superintendente-Xefe Polísia Joao Belo dos Reis.
Aleinde ne’e, sira ne’ebé tenta hasees an husi fatin mós agora koopera ho DSIK sira mai tan ona prosesu identifikasaun la’o hela. Aktu ida-ne’e konsidera flagrante delitu tanba atividade ilísitu la’o hela nune’e sei submete ba oras 72 molok kontinua prosesu ba Ministériu Públiku no Tribunál.
Sasán sira hanesan harreta box ida, triton ida ho sigaru karton 149 halo apreensaun no asegura iha Polísia tanba la priense rekizitu rejime kontrolu tabaku Dekretu-Lei 14/2016. Estimasaun folin totál produtu US$48.574, no kada karton kona US$326. Taxa ne’ebé Estadu lakon US$63.732,76.
Operasaun Konjunta ne’e envolve instituisaun sira, hanesan Autoridade Aduaneira (AA), Diresaun Servisu Investigasaun Kriminál (DSIK), Diresaun Servisu Informasaun Polísia (DSIP), Polísia Nasionál Timor-Leste (PNTL), Polísia Sientífika Investigasaun Kriminál (PCIC), D2 F-FDTL, S2 Unidade FALINTIL-F-FDTL, N2 Komponente Naval no Servisu Nasionál Intelijénsia no Estratéjia (SNIE).
Jornalista: Juvinal Cabral dos Santos
Written by: RafaFM
Lider Balu Nia Oan no Membru F-FDTL Ida Alegadamente Involve iha Komérsiu Ilísitu
todayNovember 20, 2026 11 2
Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.
Copyright Rafa.tl - Desenvolvido por Justweb.pt