Ouvir RAFA Ritmo, Voz e Coração de Timor
Abu Dhabi, 17 Novembru 2026 (RAFA)- Prezidente Repúblika, José Ramos-Horta, preokupa Governu seidauk aprova lei protesaun investimentu no lei kona-bá dupla tributasaun, ne’ebé konsidera sai obstákulu ba entrada investimentu estranjeiru iha Timor-Leste.
Jornalista RAFA, Cristina Ximenes ne´ebé akompaña Xefe Estadu iha vizita ofisiál ba EAU, iha Abu Dhabi, Tersa-ne´e, informa katak Prezidente Repúblika, José Ramos-Horta, fó ezemplu kona-bá grupu investidór boot husi Indonézia ne’ebé hakarak harii otel iha Timor-Leste atu prepara an ba Simeira ASEAN iha 2028, maibé prosesu disponibilizasaun rai seidauk hetan desizaun.
Xefe Estadu mós alerta, falta lei protesaun investimentu no mekanizmu atu evita dupla tributasaun bele hamenus konfiansa investidór estranjeiru.
“Governu halo ne’e ka la’e, tinan tolu ona, ha’u ko’alia kona-bá lei ba investimentu protesaun to’o agora seidauk iha,” hatete Prezidente Repúblika, José Ramos-Horta.
Maske hasoru obstákulu hirak ne’e, Prezidente afirma katak Emiradu Árabe Unidu (EAU) kontinua hatudu kompromisu atu apoia Timor-Leste, inklui projetu rezidénsia ba feto no labarik sira, ne’ebé espera prontu iha fulan-Agostu 2027.
Iha parte seluk, Ramos-Horta mós relata esforsu diplomátiku hamutuk ho Primeiru Ministru, Kay Rala Xanana Gusmão atu dada investimentu ba projetu Greater Sunrise, liu-liu liu husi kooperasaun ho Korea Súl.
Nia hatete, Prezidente Korea Súl simu ho pozitivu proposta husi Governu Timor-Leste no agora hela iha prosesu estudu. Proposta hirak-ne’e inklui mós dezenvolvimentu Aeroportu Internasionál Nicolau Lobato, ne’ebé iha ona apoiu finanseiru husi Governu Timor-Leste, Austrália no Japaun.
Ramos-Horta subliña, Timor-Leste presiza hadi’a kuadru legál no prosedimentu administrativu atu aproveita interese investidór internasionál no transforma oportunidade sira ne’e ba dezenvolvimentu ekonómiku nasionál. ***
Written by: RafaFM
Ramos-Horta Preokupa Governu Demora Aprova Lei Protesaun Investimentu no Lei Dupla Tributasaun
todayNovember 20, 2026 11 2
Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.
Copyright Rafa.tl - Desenvolvido por Justweb.pt