Ouvir RAFA Ritmo, Voz e Coração de Timor
Ministru Komérsiu no Indústria, Filipus Nino Pereira, vizita pavilaun balu iha espozisaun Dili International Trade Expo 2026 ne'ebé konsentra iha CCD, Tersa 17 Novembru 2026.
Díli, 17 Novembru 2026 (RAFA) – Dili International Trade Expo 2026 sai fatin esperansa ba setór privadu sira iha rai-laran, hodi promove produtu lokál ba empreza internasionál sira no buka apoiu finanseiru atu habelar sira-nia negósiu.
Ministru Komérsiu no Indústria, Filipus Nino Pereira, iha Sentru Konvensaun Díli, Tersa-ne’e, hatete espozisaun ne’e sai nu’udar fatin enkontru ba produtór no konsumidór sira atu halo tranzasaun no harii ligasaun negósiu ho parte relevante sira.
“Esperansa husi feira ida ne’e, sei iha nia rejultadu sira hanesan asesu ba kapital, asesu ba merkadu sira bele kontaktu negosiu oinsá maka bele mantein sira nia produsaun ho kualidade hodi bele iha nia kontinuidade garante ba sustentabilidade,’’ hateten Ministru Nino Pereira.
Governante ne’e esplika katak kompañia internasionál sira ne’ebé partisipa iha espozisaun ne’e aprezenta produtu ho padraun no kualidade aas. Maski produtu lokál balun seidauk prienxe kritériu no seidauk iha marka (branding) rasik, Governu kontinua promove nafatin atu nune’e bele hadia di’ak liután iha futuru.
Nia mós subliña Timor-Leste iha poténsia barak atu dezenvolve, liuliu tanba la kleur tan sei asume kargu Prezidénsia ASEAN. Tanba ne’e, nasaun presiza prepara infrastrutura, aumenta otél, no hasa’e asisténsia iha área ekonomia dijitál.
Iha fatin hanesan, Reitór Institute of Business (IOB), Pedro Barreto Ximenes, reforsa katak inisiativa Governu nian hodi realiza espozisaun ne’e di’ak tebes atu prepara fini ekonomia ba Timor-Leste.
Nia rekomenda ba Governu atu hadia sistema administrasaun no kritériu negósiu nian hodi fasilita investidór sira, hanesan akontese iha nasaun avansadu sira iha Europa no iha Ruanda (Áfrika) ne’ebé prosesu investimentu la’o lalais.
“Ita presiza kuidadu tanba tama ona ba merkadu ASEAN. Entaun, ita labele halo polítika protesionizmu. Ita iha poténsia boot atu kria produtu iha rai-laran,” afirma reitór IOB ne’e.
Nia mós relata tuir dadus tinan 2025, Timor-Leste gasta millaun 965 USD ba importasaun, ne’ebé kuaze pursentu 40 husi Orsamentu Jerál Estadu hamutuk Biliaun 2,2 USD lori hotu ba rai-li’ur.
Akadémiku ne’e husu ba públiku no Governu atu fó prioridade sosa produtu lokál sira ne’ebé Timor-Leste rasik konsege prodúz ona, duke sosa produtu husi rai-li’ur, nune’e osan bele sirkula nafatin iha rai-laran.
Empreza sira ne’ebé partisipa iha espozisaun ne’e hamutuk 260, kompostu husi kompañia lokál 180 no kompañia internasionál 80.
Jornalista: Remigia Locatelli
Written by: RafaFM
Dili International Trade Expo Esperansa Ba Setór Privadu
todayNovember 20, 2026 11 2
Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.
Copyright Rafa.tl - Desenvolvido por Justweb.pt