Noticias

PNTL Detein Joven Na’in-Rua Halo Agresaun Fiziku Hasoru Membru Polísia ida iha Tuana-Laran

todayNovember 16, 2026 20

Background
share close

Díli, 16 Novembru 2026 (RAFA)— Komandante Polísia Nasionál Timor-Leste (PNTL) Munisípiu Díli, Komisáriu Asistente Polísia Orlando Gomes, informa PNTL detein joven na´in-rua ne’ebé halo agresaun fízika hasoru membru Polísia ida to’o sofre kanek iha inus-kain iha área Tuana-Laran, Suku Vila Verde, Díli.

Kazu ne’e mosu iha Domingu-kalan bainhira Postu Polísia Tuana-Laran hetan informasaun hamutuk ho Konsellu Polisiamentu Komunitáriu (KPK) atu ba atua problema ne’ebé mak mosu agresaun hasoru membru refere.

“Iha informasaun katak iha problema iha ne’ebá. Depois ita-nia Postu Polísia iha Tuana-Laran hamutuk ho KPK, sira identifika suspeitu ida no bá iha suspeitu nia rezidénsia. Maibé suspeitu sira halo provokasaun atu mai atake KPK. Entaun, ita-nia polísia sira iha Postu Tuana-Laran tama atu halo intervensaun hodi haketak, maibé suspeitu ne’e tuku kedas ita-nia polísia nia inus to’o ran,” Komisáriu Asistente Polísia Orlando Gomes haktuir.

Komisáriu Asistente Polísia ne´e hatutan hafoin akontesimentu ne’e, ekipa Taks-Force husi Eskudra  Vera-Kruz hamutuk ho ekipa sekreta sira ba apoiu kaptura suspeitu na’in-rua ne’ebé ltransporta ona mai iha  Komandu Polísia Díli  halo identifikasaun.

Motivu husi problema ne’e tanba provokasaun ne’ebé suspeitu sira halo hasoru KPK, ne’ebé kontaktu polísia atu bá halo intervensaun, maibé situasaun ne’e ikusmai sai agresaun fízika hasoru membru polísia.

Komandu PNTL Díli foti ona prosesu identifikasaun ba suspeitu na’in-rua no detein sira durante oras 72 iha sela Komandu Polísia Díli molok aprezenta ba Ministériu Públiku hodi kontinua prosesu tuir lei.

Komandante PNTL Munisípiu Díli fó ona orientasaun ba membru polísia sira atu kontinua hala’o operasaun tama-sai iha bairru sira, ho objetivu atu prevene konflitu, mantein seguransa no asegura orden públiku iha komunidade.

Jornalista: João Carlos

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!