Noticias

INDDICA Husu Governu no Instituisaun Relevante Fó Atensaun Ba Labarik Ne’ebé Abandona Husi Família

todayNovember 16, 2026 13

Background
share close

Díli, 16 Novembru 2026 (RAFA)- Diretóra Ezekutiva INDDICA, Angelina Maria Ximenes, husu Governu Timor-Leste no instituisaun relevante sira atu hametin koordenasaun no tau atensaun hamutuk ba labarik sira ne’ebé abandona husi família, liuliu labarik sira ne’ebé inan-aman husik hela tanba ba servisu iha rai-li’ur.

Apelu ne’e Diretóra Ezekutiva INDDICA hato’o iha Semináriu ne’ebé INDDICA realiza hamutuk ho Ministériu Solidariedade Sosiál no Inkluzaun ka MSSI, Polísia Nasionál Timor-Leste ka PNTL, Servisu Migrasaun no Sosiedade Sivíl, iha salaun Ministériu Solidariedade Sosiál no Inkluzaun, Dili, Segunda-ne´e, ho  tema, “Hametin Koordenasaun, Protesaun no Kuidadu ba Labarik sira iha Kontestu Migrasaun” ho objetivu atu hametin kooperasaun entre instituisaun sira hodi asegura protesaun no kuidadu ba labarik sira ne’ebé hela iha situasaun vulnerável.

“Iha kontestu kona-bá labarik sira ne’ebé inan-aman la tau matan, entaun ami husu ba Governu no instituisaun relevante sira ne’ebé mai tuir workshop ida-ne’e atu hamutuk tau atensaun no kuida labarik sira ne’ebé husik hela husi inan-aman tanba sira ba servisu iha rai li’ur,” hatete Diretóra Ezekutiva INDDICA, Angelina Maria Ximenes.

Iha fatin hanesan, Diretór-Jerál Protesaun Sosiál husi MSSI, Florêncio Pina, hatete MSSI iha funsionáriu asistente sosiál sira ne’ebé servisu iha munisípiu to’o postu administrativu atu halo aprosimasaun ho família sira, bainhira labarik enfrenta situasaun risku no perigu tanba inan-aman husik hela.

“MSSI nia funsionáriu asistente sosiál sira iha munisípiu to’o postu administrativu organizadu atu bele halo aprosimasaun ho família sira, bainhira situasaun risku no perigu akontese ba labarik sira ne’ebé inan-aman husik hela. Maibé situasaun balun akontese tanba nesesidade atu ba servisu iha rai li’ur,” hatete Diretór-Jerál Protesaun Sosiál husi MSSI, Florêncio Pina.

Durante semináriu ne´e, parte INDDICA mós relata oinsá mak instituisaun Estadu ne´e simu ona informasaun kona-bá labarik sira ne’ebé sai vítima no abandona husi inan-aman.

INDDICA foti ona medida nesesária, inklui lori labarik balun ba fatin kuidadu hanesan misaun no orfanatu sira, atu hetan tulun, protesaun no kuidadu.

Jornalista: João Carlos

 

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!