PR Horta ho Delegasaun Esperimenta Atividade Turístika iha Dezertu Safari iha Abu Dhabi

PR José Ramos-Horta hamutuk ho delegasaun vizita no esperimenta atividade turístika Desertu Safari iha Abu Dhabi, Sesta 14 Novembru 2026.

Abu Dhabi, 14 Novembru 2026 (RAFA)- Prezidente Repúblika, José Ramos-Horta hamutuk delegasaun, Sesta-ne’e, oras Abu Dhabi, vizita no esperimenta atividade turístika Desertu Safari iha Abu Dhabi, iha Emiradus Árabes Unidus (EAU).

Jornalista RAFA, Cristina Ximenes, ne’ebé hola parte iha delegasaun vizita Estadu PR Ramos-Horta nian ba Emiradu Árabe Unidu (EAU), informa katak atividade ne’e inklui sa’e kuda-kamelu, uza karreta iha rai-henek, haree loron monu no jantar hamutuk, nu’udar parte husi esperiénsia turístika iha área dezertu.

Embaixadór Timor-Leste ba EAU, Rui Manuel Hanjam esplika atividade ne’e iha objetivu atu hatudu potensiál dezertu nu’udar destinasaun turizmu, no mós fó oportunidade ba vizitante atu komprende istória no kultura moris komunidade iha rejiaun árabe.

“Iha tempu uluk, kuda-kamelu sai parte importante husi moris povu iha rejiaun Arábe, nu’udar transporte no ajuda iha atividade loroloron. Agora, sira transforma esperiénsia ne’e sai atrasaun turístika,” Embaixadór Rui Manuel Hanjam informa.

Diplomata ne’e hatutan ikus-ikus ne’e haree katak halo relasaun ema nia moris iha dezertu ne’e mak haree hanesan kuda-kamelu sira ne’e, kuda sempre sustenta ema nia moris iha país sira hanesan Emiradus Árabe Unidu, Árabe Saudita, Quait sira ne’e. Entaun sira nia moris ne’e, mais ikus-ikus ne’e ema mai barak, sira transforma sai tiha hanesan fatin turizmu.

Embaixadór Timor-Leste ba Emiradu Árabe Unidu haktuir komunidade árabia sempre hakiak manu makikit ne’e sira fó orden, dala ruma manu makikit ne’e semo ba.

Iha tempu uluk uza manu makikit ne’e lori surat husi fatin ida ba fatin seluk, mais agora iha ne’e sira halo manu makikit ne’e bele tur iha ita nia liman, depois husik sa’e tiha, depois sira bolu fila fali, mai fila fali ita nia liman, no  ida-ne’e mak protesaun turizmu.

Nia aumenta katak vizitante sira bele esperimenta diretamente atividade tradisionál no modernu, inklui sa’e kameliu, karreta iha dezertu no haree manu makikit ne’ebé treinadu. Hanesan bele tur iha liman, depois husik sa’e tiha, nune’e bolu fila fali mai tuur iha liman ida ne’e mak protesaun turizmu.

Iha parte seluk, Ajudante Kampu ba Prezidente Repúblika iha Palásiu Prezidensiál, Majór Francisco da Silva konsidera vizita ne’e nu’udar esperiénsia foun no interesante, liuliu tanba iha Timor-Leste la iha animál kameliu hanesan iha país árabe sira.

“Ita bele dehan, esperiensia foun ida ba ita, ita sente kontente, tanba uluk ita hatene istória ne’ebé haree iha televizaun ema uza hanesan transporte tula sasan ka tula ema husi fatin ida ba fatin seluk distansia dook ne’ebé sira uza iha pasadu to’o agora,” dehan Majór Francisco da Silva.

Vizita ne’e sai oportunidade ba Prezidente Repúblika no delegasaun atu haree diretamente oinsá Emiradu Árabe Unidu dezenvolve patrimóniu naturál no kultura dezertu sai atrasaun turístika internasionál. ***