Poder Polítiku Labele Intervein iha Sistema Judisiál Timor-Leste

Sekretáriu Jerál Partidu FRETILIN, Marí Alkatiri.

Díli, 13 Novembru 2026 (RAFA)- Sekretáriu Jerál Partidu FRETILIN, Marí  Alkatiri, hateten bainhira sistema judisiária ida hetan kontrolu husi podér politiku sira mak sei hamihis públiku nia fiar ba sistema judisiál.

“Lalika politiza sistema indepedente judisiária. Kuandu poder polítika mak komesa tama tau liman ne’e,  nia tau liman duni ba iha ne’ebá, ha’u hatete kedan ba imi jerasaun foun bainhira ita halo korrupsaun sistema judisiál. Atu kurizi fali sei bele lori jerasaun rua no tolu ne’e perigozu tebes,” Fundador RDTL ne’e hateten liuhosi konferénsia imprensa iha Gabinete Eis-Titulár iha  Farol, Díli,  Sesta-ne’e.

Marí Alkatiri parte la konkorda polítiku sira halo presegisaun ba polítiku sira  seluk liuhusi  kontrola Ministériu Públiku, kontrola Tribunál tanba  ne’e asaun ida  perigozu ba sistema judisiál ne’ebé mak iha.

“Poder polítiku sala boot, ne’e perigozu tebes ba sistema judisiáriu tanba ne’e tenke respeita setór judisiáriu nia indepedénsia, bele ajuda informasaun, bele ajuda lori ema mai fó formasaun, mas labele sobu, sé ita ba Tribunál juís ida ita la fiar ba nia ne’e sente halo nusá tanba ita hatene katak iha influénsia politiká,” nia tenik.

Primeiru-Ministru iha primeiru Governu Konstitusionál (2002-2026) ne’e mós husu Prezidente Tribunál Rekursu (PTR), Afonso Carmona tenke respeita Konstituisaun RDTL.

Jornalista: Zita Menezes