Ouvir RAFA Ritmo, Voz e Coração de Timor
Díli, 10 Novembru 2026 (RAFA) – Universidade Nasionál Timor Lorosa’e (UNTL) sei hala’o serimónia graduasaun ba estudante finalista hamutuk na’in-1.790 iha loron 26-27 fulan-Novembru ne’e, inklui graduadu sira husi programa pós-graduasaun.
Vise-Reitór Asuntu Akadémiku UNTL, Câncio Manteiro, informa katak to’o agora universidade konfirma ona estudante finalista hamutuk 1.790 atu partisipa iha serimónia graduasaun ne’ebé sei hala’o iha fulan-ne’e.
Nia mós relata númeru graduandu hirak-ne’e agora daudaun tama hela iha prosesu koordenasaun téknika ho Ministériu Ensinu Superiór, Siénsia no Kultura (MESSK), tanba UNTL presiza hetan despaixu husi ministériu refere molok hala’o serimónia graduasaun tuir data ne’ebé determina.
Tuir kalendáriu akadémiku UNTL ba tinan 2026, atividade graduasaun ba semestre daruak planeia atu hala’o iha loron 16-18 fulan-Dezembru 2026. Maibé, tanba nesesidade servisu iha finál tinan no preparasaun ba selebrasaun aniversáriu (Dies Natalis) UNTL, reitór deside atu muda data graduasaun mai fulan-Novembru.
Nia mós haktuir kona-bá pedidu despaixu husi reitór ba MESSK hato’o ona iha loron 23 fulan-Outubru liubá. Maibé, tuir despaixu ka sirkulár ministeriál, prosesu verifikasaun dadus graduandu sira tenke hala’o fulan ida antes serimónia graduasaun.
Kona-bá prosesu judísiu, Câncio Manteiro afirma katak implementasaun depende ba planu no preparasaun fakuldade ida-idak.
“Saida mak importante ita presiza despaixu husi dekanu fakuldade sira ba Judisium nian, nune’e numeru despaixu sira ne’e ita tenke inklui ona iha diploma graduadu sira nian, para bele imprime,” tenik vise-Reitór UNTL ne’e.
Nia hatutan tema jerál ba graduasaun tinan ne’e mak “Graduados Competentes, Éticos, Inovadores para os Desafios Globais e o Desenvolvimento Sustentável Timor-Leste”.
Total graduandu na’in-1.790 kompostu husi programa pós-graduasaun na’in-52 no Fakuldade Agrikultura graduandu 109; Fakuldade Ekonómia no Jestaun (195); Fakuldade Turizmu, Arte, Indústria Kreativa no Kultura (63); Fakuldade Siénsia Ezata no Naturál (graduadu na’in-ualu); Fakuldade Medisina no Siénsia Saúde (239); Fakuldade Enjenaria, Siénsia no Teknolojia (220); Fakuldade Siénsia Sosiál no Polítika (322); Fakuldade Direitu (27); Fakuldade Filosofia no Siénsia Umanidade (57); Fakuldade Edukasaun no Umanidade graduadu na’in-498.
Jornalista: Cesarina de Carvalho
Written by: RafaFM
Estudante Finalista UNTL 1.790 Sei Gradua iha Novembru-Ne’e
todayNovember 20, 2026 11 2
Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.
Copyright Rafa.tl - Desenvolvido por Justweb.pt