Noticias

Mariano Assanami Sabino Fó Liberdade Ba Membru PD Apoia Figura Kandidatu PR 2027

todayNovember 10, 2026 697

Background
share close

Díli, 10 Novembru 2026 (RAFA) – Prezidenti Partidu Demokrátiku (PD), Mariano Assanami Sabino, deklara fó liberdade ba membru partidu sira atu apoia ka hili kandidatu Prezidente Republika (PR) ne’ebé konsidera iha kapasidade, maski figura ne’e la’ós husi membru PD.

Mariano Asanami Sabino  afirma maske to’o agora  PD seidauk determina figura ida atu sai kandidatu  Prezidente Repúblika períodu 2027-2032, hodi hein konversaun interna, maibé ba militante to’o simpatizante PD sira iha nivel nasionál to’o aldeia sira, livre hili no apoia kualker kandidatu PR ne’ebé iha konsiderasaun bele reprezenta Estadu.

Mariano Assanami Sabino hateten PD sei hein Preizdente Repúblika, José Ramos-Horta, atu deklara ofisialmente kalendáriu prosesu eleisaun prezidensiál, mak foin partidu bele hahú prosesu hili no determina kandidatura.

“Saida mak ha’u bele dehan, ha’u hanesan Prezidente PD hakarak fó livre ba maluk sira. Maibé, mós hanoin katak la’ós tenke ema mai husi PD, maibe ema husi ne’ebe de’it, figura di’ak PD bele aposta,” Prezidente Mariano Assanami Sabino hatete ba Jornalista sira, iha Parlamantu Nasional, Tersa ne’e.

Nia hatutan katak,  maski iha ona figura balun ne’ebé manifesta interese atu kandidata an ba PR, PD sei halo avaliasaun ho kuidadu, konsidera responsabilidade no papél importante PR  nian iha Estadu.

“Baibain Partidu Demokratiku ne’e liu hosi konversaun. Konversaun mak hili figura para kandidata an. Figura barak, balun deklara ona atu kandidatu, maibé ita haree ida,” tenik Mariano Assanami.

Nia mós subliña katak Timor-Leste iha situasaun foun iha relasaun internasionál. Tanba, nasaun ne’e agora tama ona ASEAN. Tanba ne’e, PR tenke sai figura ne’ebé bele reprezenta Timor-Leste iha nivel nasionál no internasionál.

Tuir Vise-Primeiru-Ministru ne’e hateten tan, PR la’ós de’it figura ne’ebé reprezenta Estadu. Maibé, mós tenke sai símbolu unidade nasionál, garante funsionamentu instituisaun demokrátika sira no promove rekonsiliasaun no diálogu entre instituisaun sira.

“Ne’ebé Prezidente ne’e nia unifikador, nia mak garante funsionamentu instituisaun demokrátiku sira. Nia mós mak rekonsiliador, nia mós mak diálogu funsionamentu instituisaun sira,” Mariano Assanami Sabino hateten.

Nia relata tan, kandidatu la’ós kona-bá figura feto ka mane, maibé kapasidade atu garante estabilidade Estadu, instituisaun sira, liuliu Forsa Defeza Timor-Leste (F-FDTL) no Polísia Nasionál Timor-Leste (PNTL), no mós kapasidade atu hala’o polítika estranjeira.

Jornalista: Cesarina de Carvalho

 

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!