Noticias

Aban, Ró Fugro Ba Dezenvolvimentu Greater Sunrise To’o Timor-Leste

todayNovember 10, 2026 78

Background
share close

Díli, 10 Novembru 2026 (RAFA) – Ró-ahi husi empreza Fugro Singapore Mirine Pte Lte ne’ebé kontrata ba projatu levantamentu jeofiziku no 2D sismiku ho alta rezoluzaun ba prosesu dezenvolvimentu infraestrutura of-shore no on-shore  sei to’o iha Timor-Leste, Kuarta 11 fulan-Novembru-ne’e.

Prezensa ró ne’e nu’udár preparasaun ba dada kadoras husi kampu gás Greater Sunrise no Bayu-Undan ne’ebé Governu aloká orsamentu hamutuk millaun US$12.

Ministru Petroleu Rekursu Minarai (MPRM), Francisco da Costa Monteiro, ba jornalista sira iha Parlamentu Nasionál, Tersa-ne’e, informa katak ró ne’e mai husi Singapura, no husi kompaña espesializadu ne’ebé kaer ró ne’e originalidade  husi  Holanda.

“Husi Singapura, maibé ne’e husi  kompaña ida espesializadu ba duni ida-ne’e, kompaña ne’e kompaña mundiál husi ninia orijinalidade Holanda, sobre ida-ne’e serká millaun US$12,” hatete Ministru Francisco da Costa Monteiro.

Primeiru-Ministru Kay Rala Xanana Gusmão iha debate Orsamentu Jerál Estadau faze jeneralidade ba loron daruak ne´e konvida mós Deputadu sira atu bele ba partisipa iha serimonia lansamentu Ro-ahi Fugro iha Tibar.

“Ha’u kovida hela ita-boot sira (deputadu-red), Kuarta-loraik, ita ba to’o iha Tibar simu Ró ida, depois Ministru Petroleu sei aprezenta ba ita-boot sira oinsá  hahú ho Ró ida ne’ebá atu haré ba Off-Shore kona-bá pipeline ninian atu dada ne’e,” PM Kay Rala Xanana Gusmão hateten.

Xefe Ezekutivu ne’e afirma dezenvolvimentu Greater Sunrise iha tinan 2034 bele halo ona operasaun no tinan 2027 komesa ona kontrusaun ba projetu Kuda Tasi Jahal, no to’o 2028 komesa  halo ona produsaun no faan daudaun ona.

Antes ne´e, membru Parlamentu Nasionál husi Bankada FRETILIN Antoninho Doutel Sarmento liu husi nia intervensaun, preokupa ho proposta OJE 2027 ne’ebé Governu propoin hodi tau millaun US$193 ba projetu Greater Sunrise no projetu Kuda Tasi Jahal.

“FRETILIN hakarak husu ba IX Governu atu halo esplikasaun detaladu kona-bá alokasaun husi millaun US$193 n ne’ebé atu transfere ba iha Timor Gap iha tinan 2027, hira mak projetu Greater Sunrise no hira mak ba Kuda Tasi Jahal,” Deputadu Antoninho Doutel Sarmento hateten.

Jornalista: Zita Menezes

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!