Noticias

Ministériu Edukasaun Sei Rekruta Profesór Na’in-300

todayOctober 29, 2026 2361 2

Background
share close

Díli, 29 Outubru 2026 (RAFA) – Ministériu Edukasaun (ME) sei rekruta tan profesór na’in  300-liu hodi troka profesór sira ne’ebé tama ona reforma iha tinan 2027.

Ministra Edukasaun, Dulce de Jesus Soares,  hatete Komisaun Funsaun Públika (CFP) konfirma ona dadus kona-bá profesór na’in-300-liu ne’ebé sei tama ba idade reforma iha tinan 2027. Tanba ne’e, Ministériu Edukasaun prepara ona planu rekrutamentu no atualiza kuadru pesoál atu hahú prosesu rekrutamentu iha tinan oin.

“Dadus fixu ona katak na’in-300-liu mak sei reforma, agora ami hahú halo rekrutamentu  hodi troka profesór sira ne’ebé tama ona ba idade reforma,” Ministra Dulce de Jesus Soares, hateten iha Salaun Ian Martin, Balide, Díli, Kinta-ne’e.

Governante ne’e  esplika katak, tuir planu inisiál, rekrutamentu ba profesór na’in-300-liu ne’e atu hala’o iha tinan 2026. Maibé, tanba CFP iha mós responsabilidade atu hala’o rekrutamentu ba PNTL no Ministériu Saúde, nune’e Ministériu Edukasaun deside muda rekrutamentu ne’e ba tinan 2027.

Nia hatutan rekrutamentu ne’e sei kobre nivel ensinu hotu-hotu, hahú husi ensinu pré-eskolár, ensinu báziku, ensinu sekundáriu jerál to’o ensinu sekundáriu tékniku vokasionál.

Iha fatin hanesan, Diretór Eskola Bázika Sentrál (EBC) Daralau, Manuel Soares da Silva, hatete eskola sei efnrenta falta profesór, tanba ne’e nia apresia planu Ministériu Edukasaun nian atu rekruta profesór foun iha tinan oin.

“Ami-nia pedidu falta profesór ne’e ami hato’o hotu ona mai iha Ministériu Edukasaun, maibé laiha resposta. Espera rekrutamentu ba tinan oin ne’e Ministériu Edukasaun bele koloka profesór ba ami-nia eskola tuir pedidu ne’ebé ami submeter ona,” tenik Manuel Soares da Silva.

EBC Daralau presiza profesór adisionál ba matéria língua Portugés, Tetum no Inglés. Tanba  ne’e, eskola sentrál no ninia eskola filiais sira presiza profesór tan ba matéria hirak ne’e, no totál pedidu ne’ebé aprezenta ba Ministériu Edukasaun mak profesór na’in-10.

Agora daudaun, EBC Daralau iha profesór hamutuk 12, ho estudante hamutuk 1.200.

Jornalista: Cesarina de Carvalho

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!