Noticias

Sakrifísiu Sebastião Gomes no Mártir Santa Kruz Moris Nafatin iha Povu Timor-Leste Nia Memória

todayOctober 29, 2026 68

Background
share close

Díli, 29 Outubru 2026 (RAFA)- Prezidente Repúblika, José Ramos-Horta, hatete, sakrifísiu ne´ebé Saudozu Sebastião Rangel Gomes ho martir sira 12 Novembru 1991 importante iha luta ba independénsia no kontinua moris nafatin iha povu Timor-Leste nia memória.

Xefe Estadu hato´o deklarasaun ne´e iha kalan omenajen no halot restus mortais Saudozu Sebastião Rangel Gomes, iha semitériu Santa Cruz, Kuarta-ne´e, no destaka mòs katak hamutuk ho sira hotu, korajen jornalista Max Stahl, ne’ebé lori imajen masakre Santa Kruz ba mundu tomak mak sai hanesan naroman ida ne´ebé lori esperansa no espiritu luta kontinua too Timor-Leste hetan liberdade totál.

“Sira nia sakrifísiu todan tebes. La iha istória movimentu luta libertasaun ida ne’ebé ema mate barak nune’e,” hatene Prezidente Repúblika, José Ramos-Horta nakonu ho emosaun.

Xefe Estadu mós hato’o solidariedade ba família Sebastião Gomes no afirma katak, Estadu sei kontinua fó omenajen ba veteranu, mártir no joven sira ne’ebé partisipa iha luta klandestina.

Nune’e, Sebastião Gomes iha Lalehan hateke mai rai, sira hotu-hotu ne’ebé fó sira nia vida hahú kedas ho Nicolau Lobato, komité sentrál, FALINTIL, padre, madre sira ne’ebé hakat ona ba mundu seluk.

“Ba apa, ama, ba família tomak Sebastião nian, forsa ba imi, korajen ba imi. Tanba ne’e la haluha Sebastião nia sakrifisiu, la haluha mós sakrifisiu sira hotu-hotu ne’ebé lakon sira nia vida iha 12 Novembru,” tenik Ramos-Horta.

Iha Fatin hanesan, Prezidente Komité 12 Novembru, Gregório Saldanha hatete,  transladasaun restu mortais ne’e nu’udar esforsu atu dignifika Sebastião Gomes no preserva nia memória ba jerasaun foun.

“Ohin ita rejista pájina foun iha istória luta joven estudantil, ita liga ho Saudozu Sebastião Gomes, ne’ebé ohin ita kompleta tinan 35,” haktuir Gregório Saldanha.

Nia dehan, Sebastião Gomes halo mudansa, tanba nia rate iha kotuk ema la ba vizita, realmente la’o la di’ak, entaun hanoin halo nusa mak tau fali iha oin. Tanba ne’e atu onra no dignifika Sebastião Gomes nia istória moris nafatin jerasaun ba jerasaun.

Komité 12 Novembru mós hato’o agradese ba Ministru Asuntu Kombatentes Libertasaun Nasionál, Gil Oan Soru, no kolega sira husi 28 Novembru sobrevivente sira ne’ebé fó apoiu ba prosesu mudansa ba rate foun.

Gregório Saldanha mós hato’o parabens ba nia inan-aman, tanba nia oan mesak de’it, sira fó oferta ba Maromak tanba nia mate iha Igreja no mós oferta ida hanesan asuwain ba Timor-Leste ba libertasaun nasionál.

Família Sebastião Gomes apela ba juventude no povu Timor-Leste atu hametin unidade nasionál, dame no solidariedade, no aprende hosi espíritu patriotizmu no sakrifísiu mártir sira nian.

Serimónia ne’e partisipa mós husi Vise-Primeiru Ministru, Mariano Assanami Sabino, membru Parlamentu Nasionál, membru Governu, sobrevivente sira hosi akontesimentu Motael, 28 Outubru 1991, estrutura Komité 12 Novembru no inan-aman saudozu Sebastião Gomes nian Afonso Gomes no Rita Rangel ho família sira.

Jornalista: Cristina Ximenes/Mário Fili

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!