Noticias

Embaixada Singapura iha Díli Apoia Kursu Lian Inglés Báziku Bá Ajente Administrasaun Públika Na’in-30

todayOctober 29, 2026 23

Background
share close

Díli, 29 Outubru 2026 (RAFA)—Embaixada Singapura mai Timor-Leste, foin lalais ne’e, fasilita no apoia kursu lian Inglés báziku no kapasidade komunikasaun ba ajente administrasaun públika na’in-30 husi ministériu oioin iha Timor-Leste.

Komunikadu ofisiál ne’ebé RAFA asesa revela katak kursu ne’ebé apoiu husi  Singapura liu husi Inisiativa ba Integrasaun ASEAN (IAI) hahú iha loron 05 to’o loron 23 fulan-Outubru tinan 2026.

Kursu ne’e nia objetivu mak atu hametin koñesimentu báziku partisipante sira nian kona-ba lian Inglés no kapasidade komunikasaun prátika, hodi hasa’e sira-nia konfiansa atu komunica ho efetivu iha ambiente profisionál no iha moris loroloron. Liuhusi aula interativa no ezersísiu prátiku, partisipante sira hetan oportunidade atu dezenvolve kapasidade ko’alia, rona no komunikasaun interpesoál.

Embaixadóra Teo Lay Cheng hato’o parabéns ba partisipante sira tanba kompleta ho susesu programa ne’e. Nia enfatiza importánsia lian Inglés nu’udar lian servisu ASEAN, no hateten katak profisiénsia iha lian Inglés sei ajuda funsionáriu Timoroan sira atu komunica ho efetivu liután.

Embaixadóra Teo mós enkoraja partisipante sira atu kontinua pratika lian Inglés maski kursu remata ona. Nia lia tun dehan, “Konfiansa mai husi pratika, no halo sala mak parte naturál ida husi prosesu aprendizajen.” Nia aumenta tan: “Ha’u hein katak partisipante sira sei uza ho di’ak kapasidade foun ne’ebé sira hetan iha sira-nia fatin servisu no iha interasaun ho sira-nia kolega sira husi nasaun membru ASEAN seluk.”

Partisipante sira mós fahe sira-nia hanoin pozitivu kona-bá esperiénsia aprendizajen ne’e.

“Ha’u aprende oinsá atu hakerek e-mail profisionál no komunika ho klaru iha lian Inglés. Kursu ne’e ajuda hasa’e ha’u-nia konfiansa atu komunika ho parseiru internasionál no kliente sira. Ha’u sei uza kapasidade hirak ne’e iha ha’u-nia servisu iha INSS (Instituto Nacional Seguransa Sosiál) atu esplika di’ak liután kona-bá servisu seguransa sosiál,”  hateten Zeferino da Costa Bobo, Prezidente Institu Nasionál Seguransa Sosiál (INSS) no mós nu’udár Prezidente Konsellu Fundu Rezerva Seguransa Sosiál.

“Kursu ne’e iha relevánsia boot ba responsabilidade profisionál ami nian, tanba hadi’a ami-nia kapasidade komunikasaun iha lian Inglés, liuliu iha ko’alia, hakerek no partisipasaun iha reuniaun sira. Kapasidade hirak ne’e sei ajuda ami atu troka ideia no komunica ho efetivu liután bainhira kolabora ho kolega sira husi nasaun membru ASEAN seluk,”  tenik Eliseo Pedro A. S. Borges, husi Ministériu Asuntu Ekonómiku no Turizmu no Ambiente.

“Koñesimentu ne’ebé ami hetan sei mós hasa’e ami-nia konfiansa no profisionalizmu iha envolvimentu rejionál iha futuru, no hametin kooperasaun entre Estadu Membru ASEAN sira.”

Timor-Leste kontinua aprofunda nia envolvimentu ho ASEAN, profisiénsia iha lian Inglés sei sai importante liután atu permite funsionáriu sira partisipa ho signifikadu iha diskusaun no kooperasaun rejionál. Kursu dahuluk ne’e reflete kompromisu kontinua husi Singapura atu apoia dezenvolvimentu rekursu umanu no esforsu hametin kapasidade iha Timor-Leste.

Hahú iha tinan 2000, IAI (Initiative for ASEAN Integration) nia objetivu mak atu hamenus diferensa dezenvolvimentu entre Estadu Membru ASEAN sira no hametin integrasaun rejionál. Inisiativa ida-ne’e fó apoiu ba membru ASEAN sira ne’ebé seidauk dezenvolve di’ak liu husi asisténsia téknika, treinamentu no programa habelar kapasidade (capacity-building), atu nune’e sira bele partisipa ho efetividade boot liu iha atividade no prosesu ASEAN nian.

Jornalista: Cristina Ximenes

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!