Noticias

Embaixadór UE Hasoru Xanana Gusmão Deskuti Misaun Observadór Eleisaun Prezidensiál Timor-Leste

todayOctober 28, 2026 33

Background
share close

Díli, 28 Outubru 2026 (RAFA) –Embaixadór Uniaun Europeia (UE) iha Timor-Leste, Thorsten Bargfrede, Kuarta-ne’e, iha Palásiu Governu, hasoru malu  ho Primeiru-Ministru  (PM) Xanana Gusmão, hodi deskuti kona-bá eleisaun prezidensiál no sistema eleitórál no avalia kondisaun sira atu haruka fali misaun observadór ba eleisaun prezidensiál tuir mai.

Embaixadór UE, Thorsten Bargfrede konfirma katak UE simu ona konvite atu observa eleisaun prezidensiál tuir mai iha Timor-Leste, ne’ebé karik sei realiza iha fulan-Marsu 2027, maski to’o agora seidauk iha data ofisiál ne’ebé konfirmadu.

“Ha’u mai ohin atu hala’o diskusaun ho Primeiru-Ministru, akompaña husi delegasaun ida husi Uniaun Europeia. Objetivu enkontru ne’e mak atu diskute kona-ba eleisaun prezidensiál no sistema eleitórál iha Timor-Leste,” dehan Embaixadór UE, Thorsten Bargfrede.

Nia mós akompaña ekipa téknika ne’ebé iha esperiénsia iha área polítika, jurídika no lojístika, atu avalia se kondisaun iha Timor-Leste permite ka lae UE haruka fali misaun observadór eleisaun.

Tuir Thorsten Bargfrede, diskusaun sira lao di’ak tebes, no delegasaun UE hasoru ona reprezentante husi sosiedade sivíl, Governu, média no partidu polítiku sira atu rona sira-nia hanoin kona-ba prosesu eleitórál iha Timor-Leste.

Diskusaun ho PM  Xanana fó enkorajamentu, tanba Xanana konsidera misaun observadór eleisaun husi UE nu’udar instrumentu importante ida atu hametin konsolidasaun Estadu iha Timor-Leste no aumenta konfiansa públika ba rezultadu eleisaun.

Maski nune’e, desizaun kona-ba haruka misaun observadór eleisaun sei depende ba avaliasaun kona-ba kondisaun polítika, jurídika no lojístika iha Timor-Leste.

 Jornalista: Cesarina de Carvalho

 

 

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!