Noticias

Ró Patrullamentu NRTL Betano Hatuun Hikas Ba Tasi ho Misaun Kontrola no Kombate Peska Ilegál

todayOctober 28, 2026 26

Background
share close

Manatuto, 28 Outubru 2026 (RAFA)- Ministru Defeza, Kontra-Almirante Donaciano do Rosário da Costa Gomes “Pedro Klamar Fuik”, hamutuk ho Komandante Komponente Navál F-FDTL, Komodoro Higinio das Neves,  no ofisiál superior sira seluk autoridade Defeza nian, Tersa-ne’e, ofisialmente hatun fali Ró NRTL Betano ba tasi laran iha área Behau, Munisípiu Manatuto, atu hahú fali operasaun patrullamentu marítimu hodi kontrola no kombate peska ilegál no proteje rekursu sira Timor-Leste nian.

“Betano no Jaco operasionál ona. Sira prontu atu hala’o misaun sira hodi proteje soberania, halo vijilánsia ba ita-nia bee, tasi sira iha jurisdisaun nasionál, proteje rekursu naturál sira, apoia operasaun buska no salvamentu, no afirma Timor-Leste nia prezensa iha ninia tasi. Sira halo misaun hirak-ne’e iha tempu ida ne’ebé, iha inísiu, Komponente Navál F-FDTL nia ezisténsia ema ida la rekoñese. La rekoñese hanesan tasi ne’e ita-nian. Hanoin deit katak soberania ne’e bele eziste de’it iha rai maran,” Ministru Defeza, Kontra-Almirante Donaciano do Rosário da Costa Gomes “Pedro Klamar Fuik” afirma iha nia intervensaun.

Nia esplika iha tempu uluk, ema balu la rekoñese ezisténsia Komponente Navál F-FDTL no soberania Timor-Leste nian iha tasi. Tanba ne’e, nia konsidera katak soberania nasionál la’ós de’it eziste iha rai maran, maibé tenke afirma no proteje mós iha área marítima.

“Ró patrulla rua ne’e la’ós de’it patrimóniu Estadu nian, maibé mós símbolu soberania nasionál Timor-Leste nian iha tasi. Tanba ne’e, tenke mantein ró sira iha kondisaun di’ak, operasionál no prontu atu hala’o navegasaun no misaun sira bainhira presiza,” nia subliña.

Ministru Defeza mós informa katak Governu iha ámbitu orsamentu Estadu ba tinan 2027, deside avansa ho prosesu akizisaun ró patrulla ida ho kapasidade oseánika, atu hametin tan kapasidade operasionál Komponente Navál F-FDTL iha kontrolu no seguransa marítima.

Membru Governu ne´e mós hato’o agradesimentu espesiál ba kompañia Blue Ocean, enjenheiru, tékniku, mariñeiru, ofisiál no parseiru nasionál no internasionál sira ne’ebé kontribui ho sira-nia koñesimentu no servisu profisionál lori fila fali ró rua ne’e ba tasi,

Jornalista:João Carlos

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!