Noticias

PAM Baucau Veneranda Lemos Rekoñese Dezenvolvimentu iha Área Remota Seidauk Kompletu

todayOctober 27, 2026 93

Background
share close

Baucau, 27 Outubru 2026 (RAFA)- Prezidente Autoridade Munisípiu Baucau, Veneranda Lemos, rekoñese dezenvolvimentu iha área remota sira seidauk kompletu, tanba ne’e governu kontinua fó atensaun ba nesésidade komunidade, liu-liu iha dezenvolvimentu infraestrutura bázika.

Prezidente Autoridade ne’e esplika atu hatan ba nesesidade ne’ebé povu presiza, governu lokál liu husi Programa Nasionál Dezenvolvimentu Suku (PNDS) no programa PEDN, hahú halo esforsu sira hodi tau prioridade ba komunidade nia preokupasaun sira hanesan konstrusaun estrada, kanalizasaun bee-moos, harii postu saúde no eskola. Maibé, infraestrutura boot sira hanesan estrada urbana no eletrifikasaun sei presiza apoiu husi governu sentrál, liu husi ministériu kompetente sira.

“Loos duni katak, ita haree dezenvolvimentu iha área remota sira seidauk la’o hotu, tanba ne’e mak há’u mós relata ba Prezidente  Repúblika katak, iha Munisípiu iha Programa Nasionál Dezenvolvimentu Suku (PNDS), PEDN ne’e mak hatan ba prióridade ne’ebé suku sira,” Veneranda Lemos haktuir ba jornalista sira iha Suku Ossouala, Vemasse, Baucau, Tersa-ne’e.

Nia mós informa, reabilitasaun estrada urbana iha Baucau la’o hela, ho esperansa atu konklui parte balun to’o fulan-Dezembru 2026, no kontinua dezenvolve iha tinan oin.

Xefe Suku Ossouala, Francisco Gama da Costa Lobo.

Iha parte seluk, Xefe Suku Ossouala, Francisco Gama da Costa Lobo hato’o katak komunidade sei hasoru dezafiu iha asesu ba estrada, bee moos no eletrisidade.

“Estrada hanesan ohin tun mai dalan 2 killometru ne’e mak seidauk hotu, entaun ita susar atu asesu, bainhira iha tempu udan,” haktuir Xefe Suku Ossouala, Francisco Gama da Costa Lobo.

Nia esplika, estrada balun ne’ebé naruk besik 2 quilómetru seidauk kompletu, ne’ebé halo komunidade susar atu asesu, liu-liu durante tempu udan.

Nia hatutan, postu saúde iha suku ne’e mós presiza infraestrutura adekuada atu hadi’a atendimentu ba pasiente sira.

Projetu bee-moos iha área Waisoli foin atinji progresu 17%, enkuantu aldeia balun sei hein asesu ba eletrisidade.

Xefe Suku Ossouala hein katak, ho implementasaun projetu sira ne’ebé tama ona ba prosesu tenderizasaun, komunidade bele hetan asesu ba eletrisidade no servisu báziku sira ho di’ak liután.

Komunidade hein katak koordenasaun entre governu sentrál, governu lokál no entidade kompetente sira bele acelera implementasaun projetu sira, hodi hadi’a kondisaun moris povu nian iha área remota.

Jornalista: Cristina Ximenes

 

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!