Ouvir RAFA Ritmo, Voz e Coração de Timor
Díli, 27 Outubru 2026 (RAFA)- Estadu Membru Komunidade Nasaun sira ko’alia lian Portugés (CPLP) hametin kooperasaun jurídiku kona-bá implementasaun dokumentu notariadu internasionál.
Ministru Justisa Timor-Leste, Sérgio de Jesus Fernandes da Costa Hornai, liu-husi nia diskuru iha ámbitu Konferénsia CPLP bá XIX iha Otél Palm Spring, Díli, Tersa-ne’e, afirma katak sirkulasaun no verifikasaun dokumentu notariál importante tebes ba sidadaun sira ne’ebé estuda, servisu ka hela iha nasaun seluk.
Nia esplika dokumentu notariál iha ligasaun direta ho nesesidade sidadaun sira, liuliu bainhira sira presiza uza dokumentu ofisiál iha nasaun seluk. Tanba ne’e, kooperasaun entre nasaun sira importante atu fasilita prosesu sirkulasaun no verifikasaun dokumentu hirak-ne’e.
“Dokumentu notariál iha papél importante ba sidadaun sira ne’ebé presiza uza dokumentu ofisiál iha nasaun seluk. Tanba ne’e, presiza Hametin Kooperasaun Jurídiku Bá Implementasaun Dokumentu Notariadu Internasionál,kooperasaun entre instituisaun kompetente sira presiza hametin atu fasilita prosesu verifikasaun no rekonesimentu dokumentu hirak-ne’e,” hatete Ministru Justisa Sérgio de Jesus Fernandes da Costa Hornai.
Governante ne´e afirma katak, diálogu tékniku iha konferénsia ne’e iha relevánsia boot ba preparasaun desizaun Timor-Leste kona-bá Konvensaun Apostila, ne’ebé presiza konsidera desizaun no kondisaun nesesária atu implementa.
Iha fatin hanesan Ministra Justisa São Tomé e Prínsipe, Maria Gomes Gravid, subliña katak seguransa jurídika dokumentu no aktu jurídiku sai nu’udar pilar importante atu hametin konfiansa iha instituisaun, relasaun ekonómika no sosiál, no mós Estadu Direitu.
Nia esplika katak servisu atu hametin sistema notariadu no fiabilidade dokumentu ofisiál importante tebes ba nasaun membru sira, liuliu iha tempu ne’ebé transformasaun teknolojia kontinua muda forma servisu instituisaun públika.
“Ho dezenvolvimentu teknolojia dijitál, nasaun sira presiza asegura katak dokumentu no prosesu jurídiku nafatin segurul no respeita direitu fundamentál,” hatete Ministra Vera Maria Assunção Gomes Gravid.
Ministra ne’e hato’o mós esperansa katak kooperasaun entre nasaun membru CPLP sei kontinua hametin, hodi dezenvolve sistema justisa ne’ebé besik liután ba sidadaun no responde ba nesesidade sira iha futuru.
Jornalista: Marcelino Tomae
Written by: RafaFM
CPLP iha Kompromisu Hametin Kooperasaun Jurídiku Implementasaun Dokumentu Notariadu Internasionál
todayNovember 20, 2026 11 2
Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.
Copyright Rafa.tl - Desenvolvido por Justweb.pt