Noticias

AMD Sei Aplika Pagamentu Dijitál Ba Estasionamentu iha Kristu Rei

todayOctober 27, 2026 61

Background
share close

Díli, 26 Outubru 2026 (RAFA) – Autoridade Munisipál Díli (AMD) planeia implementa pagamentu dijitál ba estasionamentu iha sítíu turístiku Kristu Rei  iha tinan 2027.

Sistema ne’e aplika ho objetivu atu fasilita jestaun estasionamentu, organiza movimentu veíkulu sira no hamenus engarrafamentu iha área turístika ne’e.

Prezidente Autoridade Munisípiu Díli, Francisco dos Santos, informa katak implementasaun sistema dijitál ne’e sei ajuda traballadór sira ne’ebé responsavel ba kontrolu estasionamentu, liuliu iha Kristu Rei, atu hala’o sira-nia servisu ho efisiénsia liu.

Nia esplika, maski pagamentu estasionamentu iha fatin ne’e hahú ona, komunidade balu seidauk koopera ho Governu atu estasiona sira-nia veíkulu iha fatin ne’ebé prepara ona. Situasaun ne’e kauza engarrafamentu, liuliu durante fin de semana.

Ho implementasaun sistema dijitál ne’e, Prezedente AMD espera katak prosesu pagamentu sei sai fasil liu, no veíkulu sira sei estasiona ho orden, nune’e fó oportunidade ba ema hotu atu asesu no aproveita fasilidade turístika sira iha área ne’e.

“Agora dadaun, sistema ne’e sei kontinua hanesan baibain. Maibé, iha tinan oin, bainhira sistema dijitál implementa ona, ema sira sei selu kedas bainhira tama. Nune’e, traballadór sira iha laran la presiza simu osan tan, maibé sei foka de’it ba organiza kareta sira atu estasiona ho di’ak. Importante mak veíkulu sira estasiona ho orden, atu ema seluk bele hetan fatin mós,” Fransisco dos Santos hatete ba jornalista sira iha  Díli, Segunda-ne’e.

Planeia Hari’i Pontu Entrada no Saída

Francisco dos Santos informa mós katak, iha futuru AMD sei aplika restrisaun ba veíkulu boot sira, inklui kamioneta no veíkulu seluk ne’ebé konsidera la apropriadu atu tama iha área turístika Kristu Rei.

Tuir nia, autoridade sei fó autorizasaun liuliu ba karreta ki’ik sira atu tama iha área ne’e. Tanba, konsidera Kristu Rei nu’udar destinasaun turístika ne’ebé presiza jestaun movimentu veíkulu ho di’ak.

Atu apoia sistema ne’e, AMD planeia atu instala makina dijitál iha pontu entrada no saída rua, ida iha asesu husi Kristu Rei no ida seluk iha asesu husi Hera.

“Ba sistema dijitál estasionamentu Kristu Rei, ita planeia atu aloka orsamentu besik US$100,000.00,  ita sei instala mákina iha pontu entrada no saída rua, ida iha asesu husi Kristu Rei no ida seluk iha asesu husi Hera. Ho sistema ne’e, ita hakarak organiza fatin ne’e atu sai área turístika ne’ebé di’ak liu. Ita sei bandu karreta boot sira tama, no fó prioridade ba karreta ki’ik sira,” nia afirma.

AMD  Koordena Reabilita Estasionamentu iha Kapital

Iha parte seluk, AMD mós koordena hela ho Direção Nasionál Transporte no Terrestre (DNTT) atu haree posibilidade reabilita fali  estasionamentu sira iha kapitál Díli, ne’ebé marka ka sinalizasaun estasionamentu balu komesa lakon ona.

Fatin estasionamentu sira ne’ebé temi inklui área Audian to’o Kuluhun, área husi Toko Lay to’o Otél Timor, no Merkadu Taibessi.

Inisiativa ne’e atu asegura katak fatin estasionamentu sira iha Díli organiza ho di’ak no fasilita utilizasaun ba públiku.

Halibur Reseita Estasionamentu no Arrendamentu

Tuir dadus orsamentál ne’ebé PAM Díli relata, reseita husi taxa estasionamentu durante períodu Janeiru to’o Outubru 2026 atinji US$73,000.00

Reseita husi publisidade durante períodu hanesan rekolla hamutuk besik US$82,000.00.

Aleinde ne’e, reseita husi fatin arrendamentu sira relata hamutuk  US$4,500.00, enkuantu Jardim Ribeira Maloa rejista reseita  US$4,900.00.

Jornalista: Remigia Locatelli

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!