Ouvir RAFA Ritmo, Voz e Coração de Timor
Governu Timor-Leste hasoru malu ho Governu Indonézia atu hetan kompromisu hodi garante empreza estatál Waskita Karya bele finaliza projetu espansaun aeroportu internasionál Prezidente Nicolau Lobato. Imajen/MTK
Díli, 26 Outubru 2026, (RAFA)- Ministru Transporte no Komunikasaun (MTK), Miguel Marques Gonçalves Manetelu, rekoñese projetu espansaun Aeroportu Internasionál Prezidente Nicolau Lobato, ne’ebé ezekuta husi empreza estatál Indonézia nian (Waskita Karya) la’o atraza. Ho nune’e, foin lalais, MTK akompaña husi Vise-Primeiru Ministru, Ministru Koordenadór Asuntu Ekonómiku, no Ministru Turizmu no Ambiente, Francisco Kalbuadi Lay, halo vizita ida ba Jakarta hodi halo aprosimasaun (G2G/Government-to-Government) ho Governu Indonézia hodi fó solusaun no garantia ba lala’ok mega projetu ne’e.
Ministru Miguel Marques Gonçalves “Manetelu” ba jornalista sira iha Parlamentu Nasionál, Segunda-ne’e, konfirma katak kompaña Waskita Karya ne’e iha tempu pasadu ne’e ministru ida mak haré, mais ho governu foun Indonézia entaun muda tiha organizasaun ida naran Danantara mak tutela ba empreza estatál sira Indonézia nian inklui Waskita Karya.
“Mais ida lidera CEO Danantara ministru investimentu Indonézia nian ne’ebé foin lalais ba hasoru nia, ita husu para Governu Indonézia tenke dudu aseita tanba rumoris barak hatete Waskita ne’e bankarrota ona, ita preokupa ida-ne’e,” Ministru Miguel Manetelu hateten.
Ministru Miguel Marques “Manetelu” adianta, Aeroportu Internasionál Prezidente Nicolau Lobato ne’e hanesan infraestrutura kritikú, estratejikú liuliu ba Timor-Leste nian lideransa simeria ASEAN 2029 nian.
“Aeroportu ne’e la hotu aviaun ne’e tuun iha ne’ebé, buat otél hotu, sentru konvensaun internasionál (ICC) sira bele hotu, mais Aeroportu la hotu halo nusa, tanba ne’e hanesan Timor-oan hanesan ministru ho ha’u nia ekipa sira liuliu AACTL ho ANATL ami halo esforsu, buat hotu-hotu ami halo para asegura aeroportu ne’e tenke hotu. Tanba ne’e, la’ós interese MTC nian, la’ós interese ami na’in tolu nian, maibé interese nasionál, interese nasaun nian,” Ministru Miguel Marques Manetelu.
Governante ne’e espliká Timor-Leste iha kompromisu politíka no tuir kalendáriu politíka ida atu lidera Simeria ASEAN 2029 tanba ne’e projetu Aeroportu ne’e tenke hotu.
“Rekoñese katak progresu iha terenu ne’e la’o tarde tanba ne’e mak esforsu sira ita halo ba hasoru Governu Indonézia, pelemenus nia hanesan empreza estatál ida, mais sira nia Governu tenke fó seguransa ba ita katak sira tenke dudu Waskita ne’e halo projetu hotu lalais ligadu ho sira nia problema ne’ebé mak iha,” Ministru Manetelu tenik.
Jornalista : Zita Menezes
Written by: RafaFM
Projetu Aeroportu Prezidente Nicolau Lobato Atrazu
todayNovember 20, 2026 11 2
Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.
Copyright Rafa.tl - Desenvolvido por Justweb.pt