Noticias

Juventude Rezisténsia Deklara Tempu Ona Konta Istória ho Lolos Ba Jerasaun Foun sira

todayOctober 26, 2026 44

Background
share close

Díli, 26 Outubru 2026 (RAFA)- Juventude Rezisténsia ne’ebé mai husi Organizasaun Rezisténsia hamutuk 25-resin, Segunda-ne’e,  organiza semináriu nasionál ho tema “Valoriza Luta Juventude Loriku  Asuwain, ho Apoiu Igreja Katólika Nian, ba libertasaun Timor-Leste”.

Semináriu nasionál ne’e atu konta istória ho lolos ba jerasaun foun sira hodi hatene, komprende no kontinua hatutan ho responsabilidade luta ne’ebé juventude Loriku Asuwain sira rai hela.

Prezidente komisaun Organizadora no Fundadór Organizasaun Populár Juventude Loriku Asuwain (OBJELATIL), Aleixo  “Cobra” da Gama,  hateten, semináriu ida-ne’e atu konsolida fila-fali organizasaun rezisténsia sira atu hamutuk fali hanesan uluk hodi konta istória kona-bá luta libertasaun nasionál ba jerasaun foun sira ho loloos.

Tuir Aelixo Cobra, tempu ohin loron, ema barak konta istória, mais la’ós autór  akontesimentu sira iha tempu rezisténsia nian.

“Ami sente katak hakarak ka lakohi ami sei moris hela, ami sei konta istória para bele halo livru ruma atu juventude foun sira ne’e bele apar ho situasaun hirak ne’e”, Aleixo Cobra tenik.

Iha semináriu ne’e aprezenta oradór prinsipál sira, maioria autór  ba prosesu luta rezisténsia husi frente armada ho frente klandestina, inklui frente diplomátiku.

Fundadór OBJELATIL ne’e hateten, organizasaun rejistensia hamutuk iha ona planu atu kria filme kona-bá istória pasadu sira nune’e rai ba jerasaun foun sira.

Iha fatin hanesan, Ministru Asuntu Kombatentes Libertasaun Nasionál (MAKLN), Gil da Costa “Oan Soru” iha diskursu hatete seminariu nasionál ne’ebé ohin hotu-hotu partisipa no kolabora, ko’alia kona-bá Juventude Rezisténsia no ejisensia Juventude agora ninian hodi kontinua fo kontribuisaun ba Dezenvolvimentu Nasionál rai ne’e nian.

“Ita hotu-hotu mai iha fatin ida-ne’e (Salaun Igreja Motael) situasaun ka pasajen pasadu moruk ida mak konvida ita hotu-hotu, husu ita hotu-hotu atu hanoin bá pasadu moruk ida ne’e hodi hanoin prezente ohin no mehi atu projeta futuru ne’ebé di’ak,” hatete Ministru Gil da Costa “Oan Soru “.

Ministru ne’e afirma, husi semináriu ne’e atu valoriza líder sira ne’ebé seidauk hatene modelu ukun an, maibé mehi iha 1974 hakarak ukun an no ikus mai sai realidade ne’e sakrifísiu boot ida, hotu-hotu tenke agradese ba sakrifísiu ida-ne’e atu projeta futuru ida di’ak liu bazeia ba mehi iha pasadu.

Jornalista: Juvinal Cabral dos Santos

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!