Tmor-Leste Kondena Atake Terorista iha Igreja Ortodoksa Grega iha Jordánia

iha Sesta, 23 Outubru 2026, akontese atake terrorista ida hasoru Igreja Ortodoxa Grega São Jorge iha provínsia Karak, Jordánia.

Díli, 25 Outubru 2026 (RAFA)–Prezidente Repúblika no laureadu Nobel ba Paz, José Ramos-Horta, kondena maka’ás atake tiruteiu masal bárbaru kontra fiar-na’in sira iha Igreja Ortodoksa grega São Jorge iha Provinsia Karak, Jordánia, Sesta, 23 Outubru 2026.

Aktu violénsia ne’ebé laiha sentidu hasoru ema sivíl inosente sira ne’ebé tuir serimónia funeral relijiozu ida-ne’e konstitui violasaun grave ba direitus umanus atu adora iha paz no liberdade.

Prezidente José Ramos-Horta iha komunikadu ofisiál ne’ebé RAFa asesa, hateten, “Atake ida-ne’e reprezenta atake ida hasoru ita-nia umanidade no valores komún, respeitu no koezaun sosiál no relijioza, liuliu iha rejiaun ida ho tensaun no inserteza boot.”

Sira ne’ebé responsavel ba planeamentu, ezekusaun no ajuda no insentiva iha aktu terror ne’ebé aat tebes ne’e tenke lori ba justisa hodi hasoru ho rigor tomak lei nian.

Timor-Leste espresa nia solidariedade no apoiu tomak ba autoridade seguransa no judisiáriu Jordania sira-nia resposta hodi garante katak autór sira responsabiliza tomak tuir lei Jordania nian.

Sita husi mídia internasionál oioin, katak iha Sesta, 23 Outubru 2026, akontese atake terrorista ida hasoru Igreja Ortodoxa Grega São Jorge iha provínsia Karak, Jordánia, ne’ebé rezulta ema hamutuk na’in-hitu  mate no maizmenus na’in-40 seluk kanek.

Atake ne’e akontese bainhira ema na’in-150 to’o na’in-200 halibur hela iha kreda nia laran hodi tuir serimónia fúnebre (hakoi ema mate).

Kronolojia akontesimentu ne’ebé fó sai husi Al Jazeera, katak ema armadu na’in-tolu, balu uza máskara, to’o iha kreda ho karreta no komesa tiru ba ema sira ne’ebé iha ne’ebá. Tiru ne’e durente ba minutu lima resin.

Públiku no autoridade sira konfirma katak ema na’in-sia (9) mak mate, katuas no ferik sira ho tinan 50 to’o 70 mak sai vítima barak liu. Ema kanek barak mós sei hetan tratamentu iha ospitál

Liurai Abdullah II hosi Jordánia promete ona katak sei buka tuir no kombate grupu ekstremista ne’e ho kastigu ne’ebé todan tebes hodi proteje unidade no seguransa nasaun nian.

Primeiru-Ministru Jafar Hassan ho Ministru  Interiór mós  Jordánia nian kondena maka’ás no konsidera  kazu ne’e nu’udar “atake terrorista” ne’ebé mai hosi ideologia ekstremista. Governu mós dekreta luto nasionál ba loron tolu.

Ministru Interiór, Mazen Al Faraya, konfirma katak atake ne’e hala’o hosi “grupu estremista ida”.

Atakante sira halo asaltu ba resintu igreja ortodoksa grega nian ida iha sidade Hammud, iha provínsia Karak, molok tiru.

“Atake ne’e halo ema na’in-hitu mate no na’in 34 kanek, husi sira ne’e na’in-27 sei baixa iha ospitál”, detallu diretór seguransa públika durante konferénsia imprensa.

Forsa seguransa sira lansa ona operasaun ida hodi lokaliza responsável sira.

Tuir autoridade sira, atakante sira tun hosi veíkulu ida no tiru durante prosisaun funerál ida.

Imajen sira ne’ebé fó sai hosi televizaun públika Al Mamlaka hatudu mane na’in rua ne’ebé armadu ho pistola  no ida seluk husi sira-na’in-tolu lori kilat naruk tiru beibeik durante minute lima resin molok sira halai.

Entre ema 150 no 200 maka iha igreja laran ka hale’u igreja iha momentu atake ne’e.

Prezidente Libanés Joseph Aoun, deskreve atake ne’e hanesan “atake terorista ida ne’ebé maka’as tebes”.

“Atake terorista hasoru Karak sei hetan resposta ne’ebé maka’as liu”, promete Liurai Jordania Abdullah II iha mensajen ne’ebé fó sai iha lian inglés iha rede sosiál.

Arsebispu Ortodoksu Gregu Jordánia nian hatete katak se objetivu hosi atake ne’e maka atu duni sai sarani sira hosi nasaun, “ida-ne’e sei konsege de’it hametin no hametin liután ita iha rai ida-ne’e.”

Biban ne’e, Patriarkadu Ortodoxo Grego iha Jerusalém no Konsellu Kreda sira nian iha Jordánia kendena maka’as atake ne’e. Sinu kreda sira nian mós lian iha Sábadu-dadeer hodi hanoin vítima sira.

Forsa seguransa Jordánia nian  kontinua halo operasaun boot hodi buka tuir no kaer autor sira ne’ebé halai tiha depois halo krime ne’e.

Jornalista: Cristina Ximenes