Rekonsiliasaun Timor-Leste ho Indonézia Sai Modelu Ba Mundu

Xefe Estadu partisipa iha diálogu rekonsiliasaun iha Festival Fronteira 2026 ne’ebé hala’o iha Suku Com, Lautem, Sábadu 24 Outubru 2026.

Lautem, 24 Outubru 2026 (RAFA) – Prezidente Repúblika, José Ramos-Horta, afirma katak rekonsiliasaun entre Timor-Leste no Indonézia sai ona ezemplu di’ak ba mundu, tanba hatudu katak dame, amizade no kooperasaun bele harii hikas relasaun entre nasaun rua, maski iha istória ne’ebé nakonu ho dezafiu.

“Rekonsiliasaun Indonesia ho Timoroan modelu ida iha mundu, ita lalika inventa tan problema. Modelu iha mundu ema hotu hotu hakfodak,” Prezidente José Ramos-Horta, hateten hafoin abertura Diálogu Rekonsiliasaun iha Festival Fronteira 2026 ne’ebé hala’o iha Suku Com, Lautem, Sábadu-ne’e.

Prezidente Ramos-Horta hatutan katak embaixadór sira ne’ebé hela iha Díli, inklui reprezentante husi nasaun Europa, manifesta admirasaun ba prosesu rekonsiliasaun entre Timor-Leste no Indonézia.

Ba nia, relasaun di’ak ne’ebé nasaun rua harii durante  ne’e sai ezemplu importante kona-bà oinsá dame no komprensaun bele supera ferida husi pasadu.

Xefe Estadu mós temi katak besik Timor-oan 10.000 mak estuda iha Indonézia, inklui iha nivel mestradu no doutoramentu (PhD). Nia afirma katak relasaun entre estudante Timor-oan no sosiedade Indonézia hatudu oportunidade atu hametin amizade, solidariedade no kooperasaun entre jerasaun foun husi nasaun rua.

Tuir Prezidente Ramos-Horta, prezensa sidadaun Indonéziu iha Timor-Leste mós la sai obstákulu ba relasaun di’ak ho povu Timoroan. Situasaun ne’e, tuir nia, hatudu katak povu husi nasaun rua bele moris hamutuk ho dame, respeitu malu no harmonia.

Prezidente Repúblika mós hato’o apelu ba ema sira ne’ebé seidauk konsege halo rekonsiliasaun, tantu iha Indonézia ka iha Timor-Leste, atu buka dalan ba dame liu husi buka apoiu husi autoridade relijioza, inklui amu bispu, atu fasilita diálogu, perdáun no rekonsiliasaun.

Jornalista: Davilio Valdamir