Primeiru-Ministru Promete Apoiu Feto Empreendedora Sira

PM Xanana Gusmão hato'o nia intervensaun iha konferénsia Nasionál Feto Empreendedora 2026, iha CCD, Sabadu 24 Outubru 2026.

Díli, 24  Outubru 2026 (RAFA)- Primeiru-Ministru (PM), Xanana Gusmão promote Governu sei haré planu feto empreendedora ne’ebé di’ak, Governu sei apoiu orsamentu hodi bele suporta feto empreendedora sira nian atividade ne’ebé mak sira bele  halo, liu-liu kona-bá oinsá aumenta produsaun lokál ho kreativu oin-oin.

“Tanba imi tenke diskuti mós iha área lubuk ida, ekoturizmu produsaun, agrikula  buat oin-oin de’it produsaun artezenál.  Ha’u ensera iha ne’e hodi fó hanoin katak konta ho Governu atu dudu, tanba, sé imi fiar Governu mós fiar imi nia kapasidade, fiar imi nia integridade, no fiar imi nia komprimisu ba rai ida-ne’e ,”  PM Xanana Gusmão hateten iha nia diskursu iha Konferénsia Nasionál Feto Empreendedora 2026, iha Sentru Konvensaun Díli (CCD), Sabadu-ne’e.

Xefe Governu  mós husu feto empreendedora sira ne’ebé iha área  turizmu lokál sira atu promové mós kulinária lokál liuhosi hahan produtu lokál nian ba turista sira,  nomós feto empreendedora  sira mós  bele kompete mós iha produsaun organiká sira.

Biban ne’e,  Koordenadora Feto Empreendedora 2026, Maria Braz hatete, Konferénsia Nasionál Feto Empreendedora 2026 hanesan, primeiru etapa atu organiza feto emprezária, empreendedora sira iha Timor-Leste ne’ebé responsavél ba negósiu ki’ik sira.

“Atu organiza aan atu kontribui makaas liután ba dezenvolvimentu nasionál liuliu atu aumenta produsaun nasionál ida-ne’e mak dezafiu boot ne’ebé  Primeiru-Ministru fó ba ami, atu bele halo nusa mak organiza feto empreendedora sira atu prodús sasan ne’ebé it abele subtitui importasaun ne’ebé ita halo agora,”nia tenik.

Nia adianta liuhosi Konferénsia Nasionál Feto Empreendedora 2026 mal bele lori feto emprezária sira husi Munisipíu 13 inklui RAEOA atu sira mai ko’alia kona-bá sira nian potensiál, sira nian planu, depois husi rezultadu  konferénsia nasionál ida-ne’e mak bele tulun di’ak liután emprenzária no empreendedora sira forma organizadu ho kuantidade no  sufisiente nomós kualidade atu bele fó resposta ba nesesidade produsaun  iha rai laran.

Konferénsia Nasionál Feto Empreendedora 2026, ne’e partisipa husi Prezidente Parlamentu Nasionál PPN Maria Fernanda Lay, Membru Governu Membru Parlamentu Nasionál , Xefe Casa Sivíl no bainaka importante sira seluk.

Jornalista : Zita Menezes