PR Sei Konsulta ho Partidu Polítiku no Sosiedade Sivíl sira kona-bá Nomeasaun Prezidente Tribunál Supremu Justisa

Prezidente Repúblika, José Ramos-Horta.

Díli, 23 Outubru 2026 (RAFA)- Prezidente Repúblika, José Ramos-Horta, sei rona opiniaun husi partidu polítiku no sosiedade sivíl sira hotu molok hili Prezidente Tribunál Supremu Justisa.

“Ha’u sei rona mós partidu polítiku sira, hanesan FRETILIN, PLP, KHUNTO, Sosiédade Sivíl bainhira atu hili Prezidente ba Tribunál Supremu Justisa,” e Prezidente Repúblika, José Ramos-Horta hateten ba jornalista sira iha Palásiu Prezidensiál, Sesta-ne’e.

Xefe Estadu esplika, nomeasaun membru Tribunál Rekursu no Tribunál Supremu Justisa la tama iha kompeténsia Prezidente Repúblika. Nia mós afirma katak estabelesimentu TSJ tenke akontese iha tinan 2026.

Ramos-Horta subliña, presiza análize ho kuidadu asuntu konflitu interese, liuliu se membru Konsellu Superiór Majistratura hakarak kandidata an ba kargu iha tribunál sira ne’e.

Tuir nia, ema ne’ebé hakarak kandidata an tenke haree lei no regulamentu atu determina se nia bele kandidata an nafatin ho pozisaun atuál ka presiza renunsia uluk. Ida-ne’e importante atu evita situasaun ne’ebé ema ida partisipa iha prosesu hili kandidatu no iha tempu hanesan kandidata an rasik.

Jornalista: Cristina Ximenes