Ouvir RAFA Ritmo, Voz e Coração de Timor
Embaixadór Malázia mai Timor-Leste, Fairuz Rozali, halo enkontru ho Ministra Edukasaun, Dulce de Jesus Soares, Tersa 20 Outubru 2026.
Díli, 20 Outubru 2026 (RAFA) – Governu Timor-Leste liu husi Ministériu Edukasaun (ME) esplora oportunidade kooperasaun ho Governu Malázia iha área formasaun ba profesór no dezenvolvimentu nivel ensinu báziku to’o sekundáriu.
liu husi enkontru entre Ministra Edukasaun, Dulce de Jesus Soares, ho Embaixadór Malázia mai Timor-Leste, Fairuz Rozali, Tersa-ne’e, iha Díli, diskute poténsia kooperasaun entre Ministériu Edukasaun Timor-Leste no instituisaun relevante sira iha Malázia.
Ministra Edukasaun, Dulce de Jesus Soares, hatete to’o agora kooperasaun direta entre Ministériu Edukasaun Timor-Leste ho Malázia seidauk iha, nune’e parte rua hakarak esplora oportunidade atu dezenvolve kooperasaun iha futuru.
“Ami espera ita bele esplora posibiliddade ba formasaun ba professor sira, iha estudu komparativu entre estudante sira, nune’e mós ho profesór sira,” hateten Ministra Dulce de Jesus Soares ba jornalista sira.
Governante ne’e hatutan katak diskusaun kona-ba kooperasaun ne’e sei iha faze inisiál, ho objetivu atu buka área sira ne’ebé bele sai prioridade ba kooperasaun entre nasaun rua, foka liu ba área ensinu superior.
Enkuantu kooperasaun iha nivel ensinu báziku to’o sekundáriu jerál seidauk dezenvolve. Tanba ne’e, Ministériu Edukasaun hakarak buka oportunidade atu estende kooperasaun ba nivel edukasaun sira-ne’e.
Iha fatin hanesan, Embaixadór Malázia iha Timor-Leste, Fairuz Rozali, informa katak kooperasaun entre nasaun rua iha área edukasaun, partikularmente ensinu superiór, kontinua hetan reforsu liuhusi Memorandu Entendimentu (MoU) kona-ba ensinu superiór ne’ebé asina iha tinan 2025.
Bazeia ba fundasaun kooperasaun ne’ebé iha ona, parte rua troka hanoin kona-ba potensial atu aprofunda tan kooperasaun iha área edukasaun, inklui iha nivel ensinu báziku no sekundáriu, tuir prioridade Timor-Leste nian.
“Diskusaun ne’e mós kobre kontribuisaun edukasaun ba dezenvolvimentu rekursu umanu, hametin relasaun entre povu rua, no Timor-Leste nia envolvimentu ne’ebé aumenta hela iha nivel rejionál,’’ tenik Fairuz Rozali.
Embaixadór Malázia iha Timor-Leste relata mós katak Embaixada Malázia hein atu kontinua hametin relasaun besik ho Ministériu Edukasaun no fasilita akompañamentu tuir mai ho instituisaun relevante sira iha Malázia, hodi identifika oportunidade kooperasaun ne’ebé apropriadu.
Jornalista: Cesarina de Carvalho
Written by: RafaFM
TL ho Malázia Hametin Kooperasaun iha Àrea Formasaun Profesór
todayNovember 20, 2026 12 2
Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.
Copyright Rafa.tl - Desenvolvido por Justweb.pt